"Intel", yoxsa AMD: Prosessor müharibələrində balans dəyişir?

Kompüter yığmaq və ya yeni noutbuk almaq istəyənlərin illərdir dəyişməyən “Intel", yoxsa AMD?” sualı son dövrlərdə daha mürəkkəb xarakter alıb. Əvvəllər bu sualın cavabı daha aydın idi: büdcə dostu seçimlər üçün AMD, yüksək performans və sabitlik üçün isə Intel üstün sayılırdı. Lakin son illərdə texnologiya dünyasında baş verən sürətli dəyişikliklər bu balansı ciddi şəkildə dəyişib.

Valyuta.az xəbər verir ki, bu gün yalnız markaya əsaslanaraq seçim etmək istifadəçiləri məyus edə bilər. Üstəlik, bu qərar yalnız prosessoru deyil, anakartdan yaddaş növünə qədər bütün sistemin quruluşuna təsir edir.

Uzun illər ərzində Intel bazarın lideri və standartları müəyyən edən şirkət kimi mövqeyini qoruyub. AMD isə əsasən məhdud büdcəyə sahib istifadəçilər üçün alternativ kimi görülürdü. Lakin "Ryzen" seriyasının təqdim olunması ilə AMD sürətlə yüksəldi və bu gün Intel-in əsas rəqiblərindən birinə çevrilib.

Mövcud məlumatlara görə, "Steam" platformasında istifadəçilərin təxminən 43 faizi artıq AMD prosessorlarına üstünlük verir. Bu isə AMD-nin təkcə fərqi azaltmadığını, eyni zamanda bəzi sahələrdə Intel-i geridə qoyduğunu göstərir.

Yüksək səviyyəli prosessorlara baxdıqda AMD-nin xüsusilə oyun sahəsində üstünlük qazandığı görünür. "Ryzen 9000" seriyası və "X3D" modelləri oyunlarda yüksək kadr sürəti ilə Intel-in ən güclü modellərinə ciddi rəqabət yaradır.

Bəzi testlərdə AMD prosessorlarının "Intel Core Ultra 200S" seriyası ilə müqayisədə 30 faizə qədər üstünlük qazandığı bildirilir. Bu üstünlük yalnız yüksək seqmentlə məhdudlaşmır, orta seqmentdə də müşahidə olunur. Məsələn, "Ryzen 5 9600X" modeli tez-tez "Intel Core i5" prosessorlarını üstələyir.

Digər tərəfdən, video montaj və çoxnüvəli güc tələb edən işlərdə Intel hələ də nüvələrin sayı baxımından üstünlüyünü qoruyur.

AMD-nin istifadəçilərə təqdim etdiyi uzunmüddətli anakart dəstəyi diqqət çəkir. Şirkət 2022-ci ildə təqdim etdiyi AM5 platformasını ən azı 2027-ci ilə qədər dəstəkləməyi planlaşdırır. Hətta köhnə AM4 platforması üçün 2025-ci ildə də yeni prosessorlar təqdim olunub.

"Intel" isə tez-tez soket dəyişdirməsi ilə tanınır. 2026-cı ildə gözlənilən yeni arxitekturalarla birlikdə istifadəçilərin yenidən anakart dəyişməsi ehtimalı artır ki, bu da əlavə xərc deməkdir.

Texniki göstəricilərə baxmayaraq, Intel illərin qazandırdığı brend gücünü qoruyur. “Intel Inside” kimi tanınan marka etibarı bir çox istifadəçi üçün seçimdə həlledici rol oynayır.

AMD isə "Ryzen" seriyası ilə keçmişdəki istilik və etibarlılıqla bağlı mənfi imicini böyük ölçüdə aradan qaldırsa da, istifadəçi vərdişlərini dəyişmək hələ də çətin qalır.

Əgər əsas məqsəd yüksək oyun performansı və uzunmüddətli sərmayədirsə, AMD hazırda bir addım öndə görünür. Lakin çoxnüvəli işlər və marka etibarı sizin üçün daha vacibdirsə, "Intel" hələ də etibarlı seçim olaraq qalır.

Paşa Məmmədli