Populyar Al alətlərini təqlid edən yeni zərərli proqramlar aşkarlandı

"Kaspersky" Təhdid Araşdırmaları komandası proqram təminatı hazırlayanları hədəf alan və populyar süni intellekt (Al) alətlərini təqlid edən yeni kiberhücum dalğası aşkar edib.

Valyuta.az xəbər verir ki, məlumatlara görə, hücumçular "Anthropic" şirkətinin "Claude Code" və "OpenClaw" kimi alətlərinin quraşdırma səhifələrini tam şəkildə kopyalayaraq istifadəçilərin sistemlərinə məlumat oğurlayan zərərli proqramlar yerləşdirirlər. Axtarış sistemlərində yayılan sponsorlu reklamlar vasitəsilə təqdim olunan bu saxta saytlar peşəkar proqramçıların hesab məlumatlarını və kripto cüzdanlarını ələ keçirməyi hədəfləyir.

Hücum üsulu istifadəçilərin rəsmi sənədləşmə hesab etdikləri səhifələrdəki quraşdırma komandalarını kopyalayıb icra etmələrinə əsaslanır. Bu komandalar vəd edilən proqramı quraşdırmaq əvəzinə, "Windows" sistemlərinə "Amatera", "macOS" cihazlarına isə "AMOS" adlı zərərli proqramları yükləyir.

"Kaspersky" mütəxəssisləri bildirir ki, bu kampaniya xüsusilə böyük təşkilatlarda çalışan və süni intellekt əsaslı proqramlaşdırma alətlərinə güvənən peşəkarlar üçün yüksək risk yaradır.

Kibertəhlükəsizlik mütəxəssisi Vladimir Qurski xəbərdarlıq edib ki, sistem yoluxduğu halda yalnız şəxsi hesablar deyil, aktiv layihələrin mənbə kodları və şirkətdaxili məxfi məlumatlar da ifşa oluna bilər.

Mütəxəssislər proqramçıları yükləmə linklərini diqqətlə yoxlamağa, xarici mənbələrdən götürülən komandaları icra etməzdən əvvəl analiz etməyə və etibarlı təhlükəsizlik həllərindən istifadə etməyə çağırır.

Paşa Məmmədli