"Neuralink"in dəyəri 42 milyard dollara çatıb - İnvestorlar Maskın startapına axışır

İlon Maskın beyin çipi hazırlayan Neuralink şirkətinin dəyəri ikinci bazarda (secondary market) həyata keçirilən son əməliyyatlarda 42 milyard dollara qədər yüksəlib.

Valyuta.az xəbər verir ki, şirkətin ötən ilki son maliyyələşdirmə raundunda müəyyən edilən 9 milyard dollarlıq qiymətləndirmə ilə müqayisədə təxminən 5 dəfə çoxdur.

Özəl bazarlar üzrə araşdırma şirkəti "Caplight" bildirir ki, son aylarda Neuralink səhmləri 29-42 milyard dollar qiymətləndirmə aralığında satılıb. Bəzi investorlar isə şirkətin səhmlərini 60 milyard dollara yaxın qiymətləndirmə ilə almağa hazır olduqlarını bildiriblər.

Ekspertlər hesab edirlər ki, "Neuralink"in sürətlə bahalaşması investorların İlon Maskın süni intellekt və robototexnika sahəsindəki layihələrinə artan marağından qaynaqlanır. Xüsusilə "SpaceX"in IPO-sundan sonra Maskın hələ də birjada listinq olunmayan şirkətlərinə investisiya etmək istəyənlərin sayı xeyli artıb.

"Neuralink" özəl şirkət olduğundan onun səhmləri əsasən şirkətin əməkdaşları və erkən investorları tərəfindən ikinci bazarda satılır. Bu səbəbdən şirkətin qiymətləndirilməsi bazardakı tələb əsasında formalaşır və rəsmi bazar dəyəri hesab edilmir.

Şirkət hazırda iflicdən əziyyət çəkən insanların kompüterləri düşüncə ilə idarə etməsinə imkan verən beyin implantları üzərində çalışır. Gələcəkdə isə bu texnologiyanın görmə qabiliyyətinin bərpasında da istifadə olunması planlaşdırılır. "Neuralink" bu ilin əvvəlində açıqlayıb ki, indiyədək 21 nəfərə eksperimental beyin çipi implantasiya edilib.

Qeyd edək ki, "Neuralink"in yeni investisiya raundu keçirib-keçirmədiyi və rəsmi bazar qiymətləndirməsinin nə qədər olduğu hələlik açıqlanmayıb. Bu ilin mayında Omanın dövlət investisiya fondu şirkətə sərmayə yatırdığını bildirsə də, investisiyanın məbləği və qiymətləndirmə açıqlanmayıb.

Sərvanə Rəmixanova