Nazirlikdən rezidentlərin maaşları ilə bağlı açıqlama

Azərbaycan Respublikası Nazirlər Kabinetinin 2024-cü il 6 sentyabr tarixli Qərarına əsasən rezidenturada həkim-mütəxəssis hazırlığı aparılan ixtisaslar üzrə hər bir təhsilalana düşən illik təhsil xərclərinin miqdarı 5600 manatdan 8600 manata qaldırılıb və bu vəsait Elm və Təhsil Nazirliyinin sifarişi əsasında rezidenturada həkim-mütəxəssis hazırlığı aparılan müəssisələrə ödənilir.

Bu barədə Səhiyyə Nazirliyindən  bildirilib.

Qeyd edilib ki, sözügedən vəsait Azərbaycan Respublikası Nazirlər Kabinetinin "Rezidentura təhsilinin məzmunu və təşkili Qaydalarının təsdiq edilməsi haqqında" Azərbaycan Respublikası Nazirlər Kabinetinin 2010-cu il 18 mart tarixli Qərarının 5.8.-ci bəndinə əsasən ümumi həkim stajına və ixtisas dərəcəsinə uyğun olaraq əməkhaqqının ödənilməsinə, 5.9-cu bəndinə əsasən rezidentin nəzəri biliklərə və peşə vərdişlərinə yiyələnməsinə, fərdi iş planlarının yerinə yetirilməsinə görə kuratorun vəzifə maaşına hər bir rezident hazırlığı üçün ayda 20 (iyirmi) manat əlavə haqq ödənilməsinə yönəldilir.

Azərbaycan Respublikası Prezidentinin 2024-cü il 23 dekabr tarixli “Əhalinin sosial rifahının yaxşılaşdırılması sahəsində tədbirlərin davam etdirilməsi haqqında” Sərəncamına əsasən Azərbaycan Respublikası Nazirlər Kabinetinin 26 dekabr 2024-cü il tarixli Qərarı ilə aylıq tarif (vəzifə) maaşları 2025-ci il yanvarın 1-dən orta hesabla 15-16% artırılıb.

Qeyd edək ki, sosial şəbəkələr və mediada rezidentlər maaşlarının azlığından şikayət edirlər.

©apa