Milyonlarla "iPhone" təhlükədə: yeni haker aləti internetə sızdırılıb

Kibertəhlükəsizlik üzrə mütəxəssislər iPhone istifadəçilərini hədəf alan ciddi təhlükə barədə xəbərdarlıq ediblər.

Valyuta.az xəbər verir ki, “DarkSword” adlı haker alətinin yeni versiyası internetdə yayımlanıb və bu, milyonlarla cihaz üçün risk yaradır.

Məlumata görə, bu alət xüsusilə köhnə iOS versiyalarından istifadə edən "iPhone" və "iPad"ləri hədəf alır. Ekspertlər bildirir ki, yayılan kod olduqca sadədir və texniki biliyi az olan şəxslər belə qısa müddətdə bu alətdən istifadə edə bilər.

Qeyd olunur ki, bu hücum vasitəsi istifadəçilərin şəxsi məlumatlarını - kontaktlar, mesajlar, zəng tarixçəsi və hətta parolları ələ keçirərək uzaq serverlərə ötürə bilir.

"Apple" şirkəti isə bildirib ki, artıq bu boşluqla bağlı təhlükəsizlik yeniləməsi yayımlanıb və istifadəçilərə cihazlarını ən son versiyaya yeniləmək tövsiyə olunur.

Sərvanə Rəmixanova