"Apple" xəritə tətbiqinə reklam yerləşdirməyə hazırlaşır

"Apple" xidmət gəlirlərini artırmaq məqsədilə "Apple Maps" tətbiqinə axtarış əsaslı reklamlar əlavə etməyə hazırlaşır.

Valyuta.az xəbər verir ki, məlumata görə, istifadəçilər xəritədə restoran və ya mağaza axtararkən sponsorlu obyektlər nəticələrin yuxarı hissəsində göstəriləcək. Bu model banner reklamlardan fərqli olaraq birbaşa axtarış nəticələrinə inteqrasiya olunacaq və istifadəçi təcrübəsini pozmadan işləyəcək.

Qeyd olunur ki, sistem hazırda şirkət daxilində test mərhələsindədir. Məsələn, istifadəçi fast food axtardıqda reklam verən brend digər nəticələrdən əvvəl xüsusi işarə ilə təqdim olunacaq.

Şirkət bu addımla reklam bazarındakı payını artırmağı və donanım satışlarından asılılığını azaltmağı hədəfləyir. Yeni modelin kiçik və orta bizneslər üçün də müştərilərə çıxışı asanlaşdıracağı bildirilir.

Sərvanə Rəmixanova