"Google" sizin dediklərinizi qeyd edir: Bu funksiyanı necə söndürmək olar?

"Google Assistent" Android istifadəçilərinin səsli komandalarını “Ok, Google” funksiyasını təmin etmək üçün izləyir. Bu, rahatlıq yaratsa da, cihazın ətraf mühiti daima “dinləməsi” deməkdir. 

Valyuta.az xəbər verir ki, bu barədə "Newsweek" yazır.

Şirkət bildirir ki, məlumatların qeyd olunması və serverlərə göndərilməsi yalnız istifadəçi tərəfindən aktivləşdirilən komandadan sonra baş verir. Lakin sistem tam dəqiq deyil və bəzən ətrafdakı səslər və ya oxşar sözlər səbəbilə səhvən aktivləşə bilər. Nəticədə şəxsi söhbətlərin hissələri də qeydə düşə bilər.

Məlumata görə, Android cihazlarında bu funksiya demək olar ki, daim aktiv olur, "iPhone" istifadəçilərində isə vəziyyət fərqli ola bilər.

Bu sistem istifadəni asanlaşdırsa da, məxfilik baxımından risklər yaradır. İstifadəçilər çox vaxt hansı məlumatların toplandığından və saxlandığından xəbərsiz olur.

Rəsmi olaraq "Google" səs məlumatlarını nitqin tanınmasını yaxşılaşdırmaq üçün toplayır. Bu, sistemin müxtəlif dilləri, aksentləri və səs-küylü mühitdə danışığı daha yaxşı başa düşməsinə kömək edir. Lakin kibertəhlükəsizlik mütəxəssisləri xəbərdarlıq edir ki, bu məlumatlar fərdiləşdirilmiş reklam profillərinin yaradılması üçün də istifadə oluna bilər.

İstifadəçilər öz məlumatları üzərində nəzarətə malikdirlər. Əsas parametr “Səs və audio fəaliyyəti” funksiyasıdır. Bu seçim bir çox hallarda standart olaraq aktiv olmur, lakin istifadəçilər telefon qurarkən və ya şərtləri oxumadan razılaşarkən onu aktiv edə bilirlər.

Bu funksiyanın vəziyyətini yoxlamaq vacibdir. Onu söndürmək gələcəkdə səs yazılarını dayandıracaq, lakin artıq saxlanılmış məlumatlar avtomatik silinməyəcək – onları ayrıca silmək lazımdır.

Təhlükəsizliyi artırmaq üçün məxfilik ayarlarını mütəmadi yoxlamaq və səs tarixçəsini silmək tövsiyə olunur.

Paşa Məmmədli