Məşhur CEO-dan resessiya açıqlaması: "Ehtimal davam edir"

"JPMorgan Chase" şirkətinin baş direktoru Ceymi Deymonun fikrincə, gömrük rüsumlarının qlobal iqtisadiyyatlara təsir göstərməkdə davam etməsi səbəbilə resessiya ehtimalı hələ də gündəmdədir.

Valyuta.az xəbər verir ki, "JPMorgan"ın Parisdə keçirilən illik Qlobal Bazarlar Konfransında "Bloomberg" televiziyasına danışan Deymon bildirib: 

"Ümid edirəm ki, bundan yayına bilərik, lakin bu mərhələdə bu ehtimalı tamamilə istisna etməzdim. Əgər resessiya baş versə, onun nə qədər dərin və ya uzunmüddətli olacağını deyə bilmərəm".

Tramp administrasiyasının gömrük rüsumları siyasəti bir aydan çoxdur ki, bazarlarda dalğalanmalara səbəb olur və Deymon bəzi müştərilərin bu qeyri-müəyyənlik səbəbindən investisiyalarını geri çəkdiyini bildirib. Bu həftənin əvvəlində ABŞ və Çin - dünyanın ən böyük iki iqtisadiyyatı - daha uzunmüddətli razılaşma istiqamətində irəlilədikcə, qarşılıqlı tətbiq olunan vergilərin müvəqqəti olaraq azaldılması barədə razılığa gəliblər.

Deymon ABŞ ilə Çin arasındakı gərginlikdə son dövrlərdə müşahidə olunan yumşalmanın qalıcı olacağına ümid etdiyini söyləyib: 

"Fikrimcə, doğru olan bəzi məsələlərdə geri addım atmaqdır. Bu, maraqlı bir dialoqun başlanğıcıdır".

69 yaşlı CEO gömrük rüsumları ilə bağlı qeyri-sabitliyin nəticələrindən birinin ABŞ-a yönələn investisiyalarda azalma ola biləcəyini vurğulayıb.

"Bu, müəyyən qədər baş verəcək. Bir çox insan bundan narahatdır. Onlarla görüşdükdə deyirlər ki, artıq Kentukki viskimizə maraq göstərmirlər", deyə o bildirib.

Deymonun sözlərinə görə, bu, təsirin geniş miqyasda hiss olunacağı anlamına gəlmir: 

"Amerika pis investisiya məkanıdırmı? Xeyr. Əgər bütün vəsaitinizi tək bir ölkəyə yatırmalı olsaydınız, bu ölkə yenə də Amerika olardı".

QEYD: Resessiya - işgüzar dövrün yüksəliş (pik) fazasından sonra gələn və iqtisadi fəallığın bir müddət davamlı olaraq geriləməsi ilə müşayiət olunan fazası. Texniki olaraq, adətən, ardıcıl iki rüb ərzində iqtisadi artım tempinin mənfi olması (ÜDM və ÜMMin səviyyəsinin azalması) halı resessiya sayılır. Resessiya istehsal həcminin, o cümlədən sənaye istehsalı həcminin, birja indekslərinin, real gəlirlərin və tələbin azalması, kapitalın xaricə axınının güclənməsi və işsizlik səviyyəsinin artımı kimi pro seslərlə müşayiət olunur.

Paşa Məmmədli