Mərkəzi Bankın “LEXUS"-u 87 min manata satışa çıxarıldı

25 fevral tarixində Mərkəzi Bankın balansında olan 21 nəqliyyat vasitəsi  3-cü dəfə təkrar hərraca çıxarılacaq. Bu dəfə avtomobillər 15% endirimlə təqdim olunacaq. Onlardan 19-u Bakı şəhərində, 2-si isə Yevlaxda yerləşir.

Valyuta.az xəbər verir ki, ən yüksək start qiyməti ilə satışa çıxarılan avtomobil 2016-cı il istehsalı “LEXUS LX 570” markalı minik maşınıdır. Onun ilkin satış qiyməti 87 279 manat, beh məbləği isə 8 727 manat təşkil edir.

Digər bahalı nəqliyyat vasitələri sırasında 2013-cü il istehsalı “MERCEDES BENZ S 500” (30 063 manat), “GMC YUKON DENALI” (25 500 manat), “MERCEDES BENZ 414” (26 628 manat) və “MERCEDES BENZ 314 İnkassasiya” (45 900 manat) modelləri də var.

Ən aşağı qiymətlə satışa çıxarılan nəqliyyat vasitəsi isə 1996-cı il istehsalı “VAZ-21213” modelidir. Yevlax şəhərində yerləşən bu avtomobilin start qiyməti cəmi 3 230 manat, beh məbləği isə 323 manatdır.

Hərraca çıxarılan digər avtomobillər arasında “BMW 740 LI”, “HYUNDAI SONATA”, “HONDA ACCORD”, “AUDI A8”, “KIA CERATO”, “HYUNDAI EQUUS”, “HYUNDAI GRANDEUR”, “HYUNDAI VERACRUZ”, “HYUNDAI H1” və digər modellər yer alır. Onların start qiymətləri 8 500 manatdan 18 700 manatadək dəyişir.

Mayya Hüseynova