"Mastercard" iri kripto nəhəngləri ilə yeni ödəniş sistemi yaratmağa hazırlaşır

Dünyanın ən böyük ödəniş şirkətlərindən biri olan "Mastercard" kripto sənayesinin aparıcı oyunçuları ilə yeni əməkdaşlıq başladır. 

Valyuta.az xəbər verir ki, şirkət blokçeyn texnologiyası əsasında yeni ödəniş sistemi yaratmağa hazırlaşır və layihəyə bir neçə iri kripto şirkətinin qoşulacağı bildirilir.

ABŞ mediası "CoinDesk"in məlumatına görə, layihə çərçivəsində mərkəzləşdirilmiş kripto birjaları, rəqəmsal ödəniş platformaları və blokçeyn şirkətləri bu sistemə daxil ediləcək. "Mastercard" bu addımla xüsusilə stabilkoinlər başda olmaqla kriptovalyuta əməliyyatlarını öz qlobal ödəniş şəbəkəsinə inteqrasiya etməyi planlaşdırır.

Yeni sistemə ilk mərhələdə kripto və maliyyə sektorunun bir neçə iri şirkətinin qoşulacağı gözlənilir. Onların arasında "Binance", "Ripple" və "PayPal" da var.

Qeyd edək ki, "Mastercard" son illərdə kripto sahəsində fəaliyyətini genişləndirib. Şirkət müxtəlif kripto layihələri və platformalarla əməkdaşlıq edərək istifadəçilərə kriptovalyutalar vasitəsilə ödəniş etmək imkanı təqdim edir. 

Sərvanə Rəmixanova