Hər gün “Bu gün son gündür” deyirlər - Müştəri bir dəfə aldana bilər...

Sosial şəbəkələrdə vaxt keçirdiyimiz zaman şirkətlərin və ya mağazaların reklam elanlarına rast gəlirik. Müraciət etdikdə "Bu gün kampaniyanın son gündür", "Bu təklif gün sonuna qədər keçərlidir" kimi ifadələrlə üzləşirik. Lakin növbəti gün yenidən eyni qaydada elan qarşımıza çıxır və geri dönüş edilir. Bir sözlə, "karusel"in içində imiş kimi görünürük.

Bu hadisə marketinq baxımından nə dərəcədə düzgündür, müştəridə güvən qazanmaq önəmlidir, yoxsa yalanlarla bəzədilmiş sözlər?

Valyuta.az-a danışan marketoloq Marat Namazov bildirir ki, bu yanaşma uzunmüddətli brend etibarı üçün çox zərərlidir:

"Qarşımıza çıxan bəzi reklam elanları yalnız qısamüddətli satış üçün işləyə bilər. Əgər həqiqətən son gündürsə, bu normal satış texnikasıdır. Amma ertəsi gün də eyni elan, eyni mətn, eyni təzyiq davam edirsə, bu artıq manipulyativ kommunikasiya, etibarı zədələyən satış dili, brendin sözünün dəyərdən düşməsi deməkdir. Çünki müştəri bir dəfə aldana bilər, amma ikinci dəfə artıq başa düşür ki “son gün” əslində son gün deyil, “endirim” həmişə var. Bu nöqtədən sonra brend haqqında düşüncə “bunlar məni inandırmağa yox, aldatmağa çalışırlar” olur. Marketinqdə ən təhlükəli itki təkcə satışın itməsi deyil. Ən təhlükəlisi inamın itməsidir. Daha sağlam yanaşmada kampaniyanın real müddəti göstərilməlidir. Əgər uzadılıbsa, açıq şəkildə “müştəri tələbinə görə, kampaniya 3 gün uzadıldı” deyilməlidir. “Son gün” ifadəsi yalnız doğrudan da son gündə işlədilməlidir. "Süni FOMO effekti" yaratmaq yox, real dəyər təklifi verilməlidir. Bu zaman brend güvən və uzun müddətli real satış əldə edə bilər".

Nuranə Mübariz