zypl.ai 2 milyon dollar investisiya cəlb edib

Fintex startapı zypl.ai yeni strateji investisiya raundu çərçivəsində 2 milyon dollar vəsait cəlb edib. Razılaşmanın nəticəsinə əsasən, şirkətin dəyəri təxminən 80 milyon dollar olaraq qiymətləndirilib.

İnvestor qismində Alif Capital Holdings şirkətinin majoritar səhmdarı və Jefferson Capital-ın direktoru Hofiz Şahidi çıxış edib. Layihə daha əvvəl də beynəlxalq investisiya fondları — Prosus Ventures, Carbide Ventures və Plug and Play Tech Center tərəfindən dəstəklənib.

Valyuta.az-ın məlumatına görə, cəlb olunan vəsait şirkətin xarici bazarlarda fəaliyyətinin genişləndirilməsinə, özünə məxsus zGAN adlı süni intellekt modelinin inkişafına, sintetik məlumat texnologiyalarının Alif Bank-ın rəqəmsal ekosisteminə inteqrasiyasına, həmçinin kredit risklərinin qiymətləndirilməsi və fırıldaqçılıq əməliyyatlarının aşkar edilməsi üzrə həllərin miqyaslandırılmasına yönəldiləcək.

Hazırda zypl.ai-ın məhsullarından 20 ölkədə 60-dan çox maliyyə təşkilatı istifadə edir. Startap Stanford Universiteti mütəxəssislərinin iştirakı ilə yaradılıb və maliyyə sektoru üçün generativ süni intellekt həllərinin hazırlanmasına fokuslanır.

Ekspertlərin fikrincə, bu razılaşma süni intellekt texnologiyaları ilə Mərkəzi Asiya və Yaxın Şərqdə sürətlə inkişaf edən fintex bazarları arasında əməkdaşlıq potensialının yüksək olduğunu göstərir.

Rəna Həsənova