Mart ayında Avropada hara isti olur? - Turistlər üçün 4 günəşli məkan

Təcrübəli səyahətçilər tez-tez yazın ilk ayını seçirlər, çünki bu dövrdə münasib qiymətlərlə günəşli Avropa kurortları tapmaq mümkündür. Eyni zamanda, nisbətən sərin hava geniş ekskursiya marşrutları planlaşdırmaq üçün əlverişli olur.

Valyuta.az xəbər verir ki, səyahət mövzusunda ixtisaslaşmış “Which? Travel” nəşri mart ayında ziyarət etməyə dəyər, həm isti, həm də nisbətən ucuz olan dörd Avropa istiqamətini seçib.

Mart 2026-da Avropada günəşli və münasib yerlər

Kataniya, İtaliya
Orta maksimal temperatur: +18°C

Siciliyada yerləşən məşhur Etna vulkanı mart ayında belə qarla örtülü ola bilsə də, adanın ən gözəl şəhərlərindən biri sayılan Kataniyada hava artıq gəzinti üçün kifayət qədər rahat olur.

Mülayim temperatur və günəşli hava şəhərin möhtəşəm barokko küçələrində uzun gəzintilər üçün idealdır. Yayın qızğın çağından fərqli olaraq, bu vaxt Sant-Aqata kilsəsini və Müqəddəs Aqata kafedralını, eləcə də şəhərin bağlarını, monastırlarını və bit-bazarlarını daha rahat görmək mümkündür. Mütləq ziyarət edilməli məkanlardan biri də Duomo meydanının yaxınlığında yerləşən məşhur La Peskeriya balıq bazarıdır.

Almeriya, İspaniya
Orta maksimal temperatur: +17°C

Əndəlüs bölgəsində yerləşən Almeriya 200 kilometrdən çox vəhşi çimərlikləri ilə seçilir. Şəhər öz səhraya bənzər mənzərələri ilə məşhurdur; bu mənzərələr “İndiana Cons” filmlərində, eləcə də “Doctor Who” və “Game of Thrones” kimi seriallarda istifadə olunub.

Tarix və memarlıq həvəskarları burada qədim Alkazaba qalasını, 1524-cü ilə aid şəhər katedralını, ərəb quyularını və İspaniya vətəndaş müharibəsi dövründən qalmış sığınacaqları ziyarət edə bilərlər.

+15–20°C aralığında dəyişən komfortlu temperatur isə Kabo-de-Qata təbiət parkında piyada gəzintilər üçün ideal şərait yaradır.

Portu, Portuqaliya
Orta maksimal temperatur: +16°C

Lissabonun turistlər arasında populyarlığı sürətlə artdığı bir vaxtda, Portu mart ayında daha sakit və rahat atmosfer təklif edir. Bu, tam yay havası olmasa da, magnoliyalar çiçəkləməyə başlayanda və günəş rəngarəng azuleju plitələrində əks olunanda, mart ayı bu təpəlik şəhəri piyada kəşf etmək üçün əla fürsət yaradır. Uzun naharlar, şərab dequstasiyaları və Doru çayı boyunca gəzintilər bu səfərin ayrılmaz hissəsinə çevrilir.

Martın əvvəlində şəhərə səfər edənlər 27 fevral–8 mart tarixlərində keçiriləcək Portu Beynəlxalq Kino Festivalının son günlərinə də düşə bilərlər. Bundan başqa, Porto-Belu (şənbə günləri Karlos Albertus meydanında), Merkadu da Aleqriya (bazar günləri Jardim du Passeiu Aleqri parkında) və daha turistyönümlü Ribeira bazarında gəzərək keramika məmulatları, qravürlər, zinət əşyaları və yerli delikateslər almaq mümkündür.

Krit, Yunanıstan
Orta maksimal temperatur: +16°C

Krit adasının tarixi abidələr, mənzərəli təbiət və geniş çimərlikləri özündə birləşdirən unikal ab-havasını mart ayında, rahat temperatur və yüksək mövsümə xas turist izdihamı olmadan hiss etmək olar.

Ay ərzində adada təxminən altı saat günəşli hava müşahidə olunur, yağışlı günlərin sayı isə cəmi səkkizdir. Elunda, Xanya və Retimno adanın ən isti bölgələri hesab olunur, Sissidə isə bir qədər sərin – təxminən +14°C olur.

Kritin paytaxtı İraklion tarixi memarlıqla zəngindir. Bununla yanaşı, venesiyalı, misirli və osmanlı təsirlərinin hiss olunduğu, tarixi XIV əsrə gedib çıxan canlı liman şəhəri Xanyanı da diqqətdən kənarda qoymaq olmaz. Yaxınlıqdakı əsas görməli yerlərə təbii çəhrayı çimərlikləri ilə məşhur Elaфонisi qoruğu və sakit Kurnas gölü daxildir.

Paşa Məmmədli