Manat avro qarşısında ucuzlaşır: Bu, iqtisadiyyat üçün nə deməkdir?

Son günlər avronun manata qarşı məzənnəsində artım tendensiyası müşahidə olunur. Bu dinamika Azərbaycan iqtisadiyyatında və biznes mühitində müəyyən suallar doğurur.

Sual yaranır ki, qarşıdakı dövrdə avronun məzənnəsində daha ciddi artım gözlənilirmi, yoxsa azalma baş verə bilər? Eyni zamanda, bu tendensiyanın Azərbaycan iqtisadiyyatı və biznes mühitinə mümkün təsirləri də diqqət mərkəzindədir.

İqtisadçı Eldəniz Əmirov Valyuta.az-a bildirib ki, manatın avro qarşısında ucuzlaşmasının əsas səbəbi, dolların avro qarşısında ucuzlaşması ilə izah olunur:

"Azərbaycan Respublikasında dollar-manat məzənnəsi inzibati metodlarla təyin olunur və 1 USD = 1.7 AZN nisbətində sabit saxlanılır. Bu səbəbdən dolların dəyərində beynəlxalq səviyyədə baş verən dəyişikliklər Azərbaycanda manata birbaşa təsir göstərmir. Nəticə etibarilə, manatın digər valyutalara, o cümlədən avroya qarşı məzənnəsi dolların həmin valyutalarla olan nisbətindən asılı olaraq formalaşır. Belə ki, əgər dollar avro qarşısında ucuzlaşırsa, avro manat qarşısında bahalaşır, əgər dollar avro qarşısında bahalaşırsa, avro manat qarşısında ucuzlaşır". 

"Bu dəyişikliklərin Azərbaycan iqtisadiyyatına təsiri isə böyük deyil. Bunun əsas səbəbi odur ki, ölkənin valyuta ehtiyatlarında və beynəlxalq ticarət ödənişlərində dolların payı yüksəkdir. Bu baxımdan, avronun məzənnəsindəki dalğalanmaların iqtisadiyyata nə ciddi mənfi, nə də böyük müsbət təsiri müşahidə edilmir.

Bəzi sahələrdə müəyyən mənfi və ya müsbət təsirlər yarana bilsə də, ölkə iqtisadiyyatı üçün bu prosesin ciddi mənfi tərəfləri yoxdur", - deyə E.Əmirov əlavə edib.

Mayya Hüseynova