"Apple" əsas versiyalı "iPhone 18"in buraxılışını 2027-ci ilə qədər təxirə saldı

"Apple" 2026-cı ildə diqqətini premium "iPhone" modellərinin satışına yönəldəcək, əsas versiyanı isə 2027-ci ilin birinci yarısına qədər çıxarmayacaq.

Valyuta.az bu barədə "Nikkei Asia"ya istinadən xəbər verir.

Məlumata görə, 2026-cı ilin payızında şirkət ilk qatlanan "iPhone" modelini və inkişaf etdirilmiş kamera və ekranlara malik iki Pro-versiyanı təqdim edəcək. Buna yarım il sonra, 2027-ci ilin yazında, "iPhone 18", "iPhone 18e" və ehtimal ki, "iPhone Air 2" təqdim olunacaq.

Qərarın əsas səbəbləri resursların optimallaşdırılması və daha bahalı modellərin satışından gəlirin artırılmasıdır. Əlavə amil kimi yaddaş çiplərinin və materialların qiymətinin yüksəlməsi, eləcə də ilk qatlanan "iPhone"un istehsalında mürəkkəb texnologiyalardan istifadə ilə bağlı istehsal risklərinin azaldılması göstərilir.

Bir "iPhone" komponentləri təchizatçısının rəhbər meneceri bildirir ki, tədarük zəncirinin fasiləsizliyi cari ilin əsas problemlərindən biridir. Loqistika çətinlikləri və dəyişdirilmiş marketinq strategiyası "Apple"ın premium modelləri prioritetləşdirməsinə səbəb olub.

Bununla belə, "iPhone 17" seriyasına tələbat yüksək qalır. 17-ci nəsil "iPhone"un uğurlu satışları sayəsində "Apple" 2011-ci ildən bəri ilk dəfə "Samsung"u keçərək smartfon bazarına rəhbərlik edib. Şirkət ilin sonunda satışları 10% artıraraq bazarın 20%-ni ələ keçirib.

Paşa Məmmədli