"Bir dəfə yarat, paylaş və rahat qazan: passiv gəlir mifinin pərdəarxası"

Pul itkisinə yol vermədən “bir çoxuna satış” modelini necə düzgün tətbiq etmək olar.

“Bir çoxuna satış” modeli bir çox təsisçiyə cazibədar görünür. Məhsulu bir dəfə yaradırsan, paylaşır və dəniz kənarında oturaraq pul qazanırsan.

Bunun arxasında məntiq var — təsisçilər, sahibkarlıq fəaliyyəti olmayan şəxslərlə müqayisədə 30 faiz bəndi daha qeyri-sabit gəlirə malik olurlar. Bu səbəbdən, sabit passiv gəlir axını vədi biznes sahibləri üçün cəlbedici görünür.

Amma reallıqda bir çox təsisçi bu modelin cazibəsinə aldanaraq böyük məbləğdə pul itirir. Çünki onlar bunun da ciddi əmək tələb etdiyini nəzərə almadan başlayırlar.

Tez-tez rast gəlinən bir hal odur ki, sahibkar heç kimə lazım olmayan bir kurs təqdim edir və konversiya gətirməyən məzmuna reklam xərcləyir. Buradakı problem “bir çoxuna satış” modelində deyil, onu tərsinə tətbiq etməkdədir.

Düzgün tətbiq edildikdə bu, biznesi böyütmək üçün ən yüksək gəlir gətirən üsullardan biri ola bilər. Əks halda, bu, sadəcə baha başa gələn bir hobbi olur.

Bu modeli məzmun yaradıcısı kimi deyil, bir operator kimi necə tətbiq etməli:

Bazarınızı anlamaqla başlayın

Ən sürətli pul itkisi yolu, bazarın nə istədiyinə dair fərziyyəyə əsasən təklif yaratmaq və ya sadəcə özünüzün təqdim etmək istədiyiniz şeyi yaratmaqdır.

Ən sürətli qazanc isə insanların artıq axtardığı şeyə əsasən təklif yaratmaqla mümkündür.

Heç nə yaratmazdan əvvəl, bazarınızla bu vaxta qədərki qarşılıqlı əlaqələri düşünün. İnsanlar sizdən nəyi tez-tez soruşur? Əvvəlki müştərilərinizə baxın – onlar sizi işə götürməzdən əvvəl və ya sonra nə ehtiyac duyurdular?

Sizin dəfələrlə izah etməli olduğunuz mövzular varmı? Ola bilsin, bu izahları daha əlçatan formada təqdim edərək mövcud xidmətlərinizi gücləndirmək və ya yeni müştərilər üçün daha ucuz başlanğıc nöqtəsi təklif edə bilərsiniz.

İstehsalınızı sadə saxlayaraq gəlirinizi qoruyun

Yüksək istehsal keyfiyyəti həmişə yaxşı nəticə gətirmir. Əksinə, erkən mərhələdə istehsalı şişirtmək “bir çoxuna satış” modelində tez-tez rastlanan pul israfıdır.

Təklifinizin ilk versiyasını sadə və praktik saxlayın. Mükəmməlliyi gözləmədən təqdim edin — çünki qaralamalarda qalan məhsul heç vaxt satılmayacaq. Sonra isə öz ideyalarınıza və müştəri rəyinə əsasən onu təkmilləşdirin.

Həqiqətən də, sadə saxlayın: ekran paylaşımı ilə özünüzü qeyd edin, sadə təqdimat slaydlarından istifadə edin, bahalı studiyalarda çəkiliş etməyə ehtiyac yoxdur. Elektron məktubları sadə brend üslubunda hazırlayın.

Unutmayın ki, bu mərhələdə məqsəd tələbatı yoxlamaqdır. Hələ nə işləyəcəyini bilmədiyiniz üçün mükəmməlliyə ehtiyac yoxdur. Təklifin sadə formada təqdim olunması və zamanla təkmilləşdirilməsi daha sərfəlidir.

Əvvəlcə canlı satış aparın

Bu, mütləq şərtdir. Kursu əvvəlcədən yazmaq və onun üçün avtomatik satış tuneli yaratmazdan əvvəl, həmin təklifi canlı şəkildə bir neçə dəfə satmalısınız.

Canlı satışın bir neçə vacib funksiyası var: qiymət strategiyasının işlək olub-olmadığını göstərir, əslində tələbatın olub olmadığını sübut edir və təqdimat zamanı yarana biləcək sualları və ya uyğunsuzluqları aşkara çıxarır. Canlı satış həm də ilkin gəlir formalaşdırır və bu gəlir, təklifin avtomatlaşdırılmış versiyasının hazırlanmasına kömək edə bilər.

Sadə dillə desək: əgər insanlar təklifi sizin izahınızla belə almırlarsa, avtomatlaşdırma bunu dəyişməyəcək.

Tək bir satış tuneli qurun

Tez-tez buraxılan bir səhv də birdən çox tunel yaratmaqdır. “Bir çoxuna satış” modeli fokuslananda daha uğurlu olur.

Tək bir əsas tunel seçin: bir aparıcı mənbə, bir əsas material, bir nurturinq axını və yalnız bir aydın çağırış (CTA). Əvvəlcə bu sistemi qurun və nəticə verənə qədər başqa bir şeyə keçməyin.

Məsələn, bülleten göndərə və oxucuları konsultasiya zənginə yönəldə bilərsiniz. Və ya vebinar keçirə və iştirakçıları qrup proqramına dəvət edə bilərsiniz. Hər nədirsə, əvvəlcə onun işlək olmasını təmin edin.

Düzgün göstəriciləri izləyin

“Bir çoxuna satış” modelində əsas göstəricilər konversiya göstəriciləridir. Ən vacib göstəricilər: hər bir müştəri üçün xərclənən vəsait və bu müştərilərin tunelin növbəti mərhələsinə keçid faizi.

Digər faydalı göstəricilər: satış dövrünün uzunluğu və bir abunəçi və ya müştəri üçün ümumi xərclərdir. Bu göstəricilər sizə qərar vermə müddətini və müştərinin nə qədər pul xərclədiyini göstərir.

Son olaraq, təklifdən faydalanma və təkrar alış kimi göstəricilərə də diqqət edin. Çox vaxt müştərilər belə təkliflərdən məmnun qalmır və təkrar alış etmirlər. Təklifinizin dəyərini artıraraq onların qayıdışını təmin edin.

Əsas göstəriciləri dəqiq hesablamağa çalışmaqla vaxt itirməyin. Əsas olan — ilkin mərhələdə vəziyyətin necə getdiyinə dair ümumi anlayışa sahib olmaqdır.

Nəticə sübuta yetməyibsə, miqyası artırmayın

Sonda isə, insanlar miqyas artırmaqda tələsərək pul itirirlər. Reklam, tərəfdaşlıqlar və genişlənmə strategiyaları ancaq əsas sistem işlədikdə faydalıdır.

Miqyas artırmadan əvvəl, təklifinizin sabit gəlir və maraq yaratdığına əmin olun. Müştəri davranışı haqqında məlumatlarınız və həmin davranışları təsvir edən göstəriciləriniz olmalıdır. Prosesi təkrarlamaq mümkün olduğuna inamınız formalaşmalıdır.

Əgər hələ də marketinqə satışdan daha çox pul xərcləyirsinizsə və ya ümumi nəzarətiniz yoxdursa, dayanın və əvvəlcə bu məsələlərə fokuslanın.

Sistem sabit işləməyə başladıqdan sonra isə, daha çox xərcləmək məntiqlidir, çünki bu artıq işləyən mexanizmi gücləndirəcək.

Nəticə olaraq:

“Bir çoxuna satış” sadəcə təsisçi olaraq sizə rıçaq qazandıran bir vasitədir. Onlayn uğur qazanan şəxslər bu mərhələyə çatmaq üçün aylar, illər ərzində təkliflərini test ediblər. Odur ki, əgər sizdə də bu zaman alırsa, ruhdan düşməyin.

Uğur qazananlar kimi, siz də məlumatlara əsaslanın, təcrübələr aparın və iterasiya prosesinə açıq olun. Bu strategiyanı tam bir sistem kimi yanaşmaq sizə uğura çatmaq üçün ən real şansı təqdim edəcək.

Tənzilə Ağabalayeva