ABB xarici bankda nəzarət səhm paketi alır

“Banklar haqqında” Azərbaycan Respublikası Qanununun 24.5-ci maddəsinə uyğun olaraq, “Azərbaycan Beynəlxalq Bankı” ASC-nin səhmdarlarının növbəti ümumi yığıncağı 7 may 2026-cı il tarixində baş tutacaq.

Valyuta.az xəbər verir ki, bankın nizamnaməsinə əsasən, bu dəfə səsvermə ənənəvi formatda deyil, qiyabi qaydada həyata keçiriləcək.

Səhmdarlar öz mövqelərini Azərbaycan Respublikasının Milli Depozit Mərkəzinin İnvestor Portalında (invp.e-mdm.gov.az) yaradılmış şəxsi kabinet vasitəsilə elektron şəkildə bildirəcəklər.

Yığıncağın gündəliyində bir sıra mühüm məsələlər yer alır. Bunlara 2025-ci il üzrə auditdən keçmiş maliyyə və idarəetmə hesabatlarının təsdiqi, əldə olunan maliyyə nəticələrinə əsasən dividendlərin ödənilməsi, aktivlərin idarə olunması üzrə yeni törəmə şirkətin yaradılması, xarici bankda nəzarət səhm paketinin alınması, həmçinin Müşahidə Şurasının tərkibində dəyişikliklər daxildir.

Səhmdarlar üçün bildirişlər 19 mart 2026-cı ildən etibarən əlçatan olacaq. Gündəlik məsələlərə dair materiallar və səsvermə bülleteni isə 15 aprel 2026-cı il tarixindən şəxsi kabinetlərdə yerləşdiriləcək.

Elektron səsvermədə iştirak etmək istəyən səhmdarlar 15 aprel tarixindən başlayaraq 6 may 2026-cı il daxil olmaqla mövqelərini sistem üzərindən təqdim edə bilərlər. Verilən səslərin yekun hesablanması isə ümumi yığıncağın keçirildiyi gün aparılacaq.