Kredit təsdiqlənən sifariş ləğv edilərsə, kredit tarixçəsinə təsir edirmi?

Müştəri onlayn mağazadan endirim kampaniyası zamanı məhsul sifariş edib, kredit təsdiqlənib və ilkin ödəniş qəbul olunub. Daha sonra satan tərəf “stok yoxdur” əsasını göstərərək sifarişi ləğv edib və ilkin ödənişi geri qaytarıb. Lakin vətəndaş həmin məhsulun daha yüksək qiymətlə yenidən satışa çıxarıldığını müşahidə edib. 

Sifarişin satıcı tərəfindən ləğv edilməsi müştərinin kredit tarixçəsinə mənfi təsir göstərə bilərmi?

Bank məsələləri üzrə ekspert Əkrəm Həsənov Valyuta.az-a bildirib ki, əgər bu prosesdə bank və ya bank olmayan kredit təşkilatı iştirak etməyibsə, bu, kredit hesab edilmir: "Bu, nisyə alqı-satqıdır. Müqavilə bağlanılıbsa və ödəniş edilibsə, mağaza öz öhdəliyini icra etməlidir. Məhsul mövcud deyilsə belə, bu hal öhdəlikdən imtina üçün əsas sayılmır. Belə vəziyyətdə vətəndaş Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinə və ya məhkəməyə şikayət edə bilər. O, həmçinin malın müqavilədə göstərilən qiymətlə təqdim olunmasını tələb etmək hüququna malikdir. Eyni zamanda, bu halın müştərinin kredit tarixçəsinə hər hansı mənfi təsiri yoxdur".

Mayya Hüseynova