2026-cı ildə köçmək üçün ödəniş edən 5 Avropa ölkəsi

Xaricə köçməyi arzulayırsınızsa, lakin xərclər sizi narahat edirsə, bəzi Avropa ölkələri bu prosesi daha ucuz — hətta gəlirli — etməyə çalışır. Nağd qrantlar, vergi güzəştləri və demək olar ki, pulsuz mənzil kimi təşviqlər vasitəsilə yerli hökumətlər yeni sakinləri və uzaqdan işləyənləri cəlb etməyə çalışır.

"International Living" 2026-cı ildə köç üçün təşviqlər təklif edən bir neçə Avropa məkanını müəyyən edib, lakin bu proqramların əksəriyyəti müəyyən şərtlərlə müşayiət olunur.

Aşağıda köçdüyünüzə görə faktiki olaraq sizə ödəniş edən Avropa yerləri və bu proqramlara necə uyğunlaşa biləcəyiniz təqdim olunur:

İtaliya

Əgər çox uzaq bir qəsəbəyə köçməyə razısınızsa, evi cəmi 1 avroya almaq mümkün ola bilər. Bundan əlavə, kirayə və enerji xərcləri üçün subsidiyalar da təqdim edilə bilər. Lakin bu təkliflərlə bağlı əsas məqamlar bunlardır:

— Alıcılar adətən evi müəyyən müddət ərzində təmir etməyə borcludur.
— Təmirin tamamlanmasını təmin etmək üçün depozit tələb olunur.
— Əlavə xərclərə mühəndis sertifikatları kimi təsdiq haqları daxil ola bilər.

Bəzi İtaliya regionları yeni sakinləri cəlb etmək üçün böyük qrantlar təklif edir:

— Trentino bölgəsi ev alışı və ya təmiri üçün 100 min avroya qədər qrant verir, lakin həmin evdə yaşamaq şərtdir.
— Florensiyadan təxminən bir saat cənubda yerləşən orta əsr qəsəbəsi Radikondoli də qrant və subsidiyalar təklif edir. Bu proqram ən azı 10 il orada yaşamağı tələb edir.
— Cənub bölgələrində 10 il müddətinə 7% sabit vergi tətbiq oluna bilər ki, bu da 40%-dən çox olan yüksək vergi dərəcələri ilə müqayisədə böyük qənaət deməkdir.

İspaniya

İspaniyanın bəzi kənd qəsəbələri əmlak alan şəxslərə nağd ödənişlər, ucuz və ya pulsuz torpaq və digər maliyyə üstünlükləri təqdim edir. Bunun müqabilində isə yerli sakin və vergi ödəyicisi kimi qeydiyyatdan keçmək və müəyyən müddət həmin evi əsas yaşayış yeri kimi istifadə etmək tələb olunur.

— Asturiya bölgəsindəki Ponga kəndi yeni köçənlərə təxminən 3,000 avro verir.
— Ekstremadura bölgəsi uzaqdan işləyənlər üçün 15,000 avroya qədər qrant təklif edir.
— “Bekhem qanunu” kimi tanınan xüsusi vergi rejimi müəyyən müddət üçün sabit vergi dərəcəsi tətbiq etməyə imkan verir və beynəlxalq mütəxəssislər üçün cəlbedicidir.

İrlandiya

İrlandiyada ciddi mənzil çatışmazlığı mövcuddur və hökumət boş qalan evləri istifadəyə qaytarmaq üçün maliyyə təşviqləri təqdim edir. Yaşamaq üçün yararlı hala gətirilməsi məqsədilə boş və ya yararsız evlərin təmiri üçün 70,000 avroya qədər qrant verilir. Bəzi adalarda bu məbləğ 84,000 avroya çata bilər.

Şərtlər bunlardır:

— Təmir olunan ev əsas yaşayış yeri kimi istifadə edilməli və ya icarəyə verilməlidir.
— Əmlak fiziki şəxsin adına olmalıdır, şirkət adına deyil.
— Bu vəsait şəxsi xərclər üçün deyil, yalnız təmir və bərpa işləri üçün nəzərdə tutulur.

Yunanıstan

Bəzi kiçik və uzaq Yunan adaları yeni sakinləri cəlb etmək üçün səxavətli təşviq paketləri təqdim edir. Məsələn, Antikitera adasında ev, torpaq sahəsi və aylıq 500 avro ödəniş təklif olunur. Bu ödəniş 5 il davam edə bilər.

Bundan əlavə, əhalisi azalan bölgələri dirçəltmək üçün milli proqram da mövcuddur və 10,000 avroya qədər dəstək verə bilər. Bu dəstək adətən kirayə xərclərinin ödənilməsi formasında təqdim olunur, xüsusilə müəllimlər, həkimlər və tibb bacıları üçün.

Yeni sakinlər üçün əsas üstünlüklərdən biri xüsusi vergi rejimidir:

— 7% sabit gəlir vergisi tətbiq oluna bilər.
— Bu güzəşt 15 ilə qədər davam edə bilər.

Portuqaliya

Portuqaliya uzun müddətdir ki, xüsusilə kənd ərazilərində məskunlaşmaq istəyən xarici vətəndaşlara açıqdır. “Emprego Interior Mais” proqramı çərçivəsində uyğun şəxslərə 6,000 avroya qədər birdəfəlik köç qrantı təqdim olunur.

Bu vəsait köç xərclərini qarşılamaq üçün nəzərdə tutulub və hər bir ailə üzvü üçün əlavə 20% bonus verilə bilər.

Uyğunluq şərtləri:

— Xarici vətəndaşların hüquqi rezident statusu olmalıdır (adətən D8 vizası).
— Proqram gəlir əsaslıdır və minimum aylıq gəlir təxminən 3,500 avro olmalıdır.

Tənzilə Ağabalayeva