Smartfonlarda meyarlar dəyişdi: Qiymətin yerini tək bir xüsusiyyət aldı

Smartfon bazarında illərdir davam edən iOS və Android rəqabətində balans dəyişməyə başlayır. Bu günə qədər istehlakçı seçimlərinə ən çox təsir edən əsas meyar qiymət olduğu halda, son məlumatlar bu prioritetin yerini başqa bir xüsusiyyətin aldığını göstərir.

Valyuta.az xəbər verir ki, "Allstate Protection Plans" tərəfindən aparılan geniş istehlakçı sorğusu texnologiya dünyasında yeni mərhələnin başlandığını göstərir. Artıq istifadəçilər yeni telefon alarkən qiymət etiketindən çox cihazın bir şarjla nə qədər müddət işləyə bildiyinə diqqət yetirir. Batareya ömrü tarixdə ilk dəfə qiyməti geridə qoyaraq alış qərarına təsir edən əsas amilə çevrilib.

Son dövrlərdə texnologiya gündəmində geniş yer tutan süni intellekt mövzusu isə son istifadəçilərin prioritet siyahısında hələlik ön sıralara yüksələ bilməyib. İstehlakçılar yaddaş həcmi, kamera keyfiyyəti və ekran ölçüsü kimi konkret xüsusiyyətlərə üstünlük verərkən, şirkətlərin böyük investisiya qoyduğu süni intellekt funksiyaları hələ gözlənilən marağı qazanmır. 

İqtisadi şəraitin təsiri ilə insanlar hər il telefon dəyişmək əvəzinə, mövcud cihazlarını mümkün qədər uzun müddət istifadə etməyə üstünlük verir. Sorğuda iştirak edənlərin 21 faizi telefonunu sıradan çıxana qədər dəyişməyi düşünmür, böyük bir hissə isə eyni cihazdan 2–4 il istifadə edir. Bu mənzərə hər yeni model ilə satış rekordlarının qırıldığı dövrün tədricən geridə qaldığını göstərir.

İstifadəçilərin bu “dayanıqlılıq” gözləntisi "Apple" və "Samsung" kimi bazar liderləri üçün ciddi sınaq deməkdir. Çinli rəqiblər artıq silikon-karbon batareya texnologiyasına keçid etdiyi halda, bu iki nəhəng hələ də ənənəvi yanaşmalardan istifadə edir. "Samsung"un son flaqman modeli "Galaxy S26 Ultra" və "Apple"ın "iPhone 17 Pro Max" modeli təxminən 5000 mAh batareya tutumu ilə standart performans təqdim edir. Buna qarşılıq "Oppo" və "OnePlus" kimi markalar 7500 mAh səviyyəsinə çataraq bir şarjla üç günə qədər istifadə imkanı vəd edir. Bu böyük fərq rəqabətin istiqamətini enerji səmərəliliyinə yönəldib.

"Samsung" rəsmiləri bu sahədə rəqiblərindən bir qədər geri qaldıqlarını qəbul etsələr də, silikon-karbon texnologiyası üzərində intensiv iş apardıqlarını bildirirlər. Lakin yeni nəsil batareyaların şirkətin ciddi təhlükəsizlik və təsdiqləmə standartlarından keçməsi vaxt tələb edir. Gözləntilər özünü doğruldarsa, növbəti model olan "Galaxy S27 Ultra"da bu köklü dəyişiklik müşahidə oluna bilər.

Artıq istehlakçıların diqqəti parlaq proqram təminatından daha çox elektrik şəbəkəsindən asılılığı azaldan həllərə yönəlib. Görünən odur ki, yaxın illərdə smartfonların uğurunu onların sürəti deyil, nə qədər uzun müddət işləməsi müəyyən edəcək.

Paşa Məmmədli