Kompüterinizi yavaşladan 7 tətbiq

Kompüterinizin əvvəlki kimi sürətli işləməməsinin səbəbi təkcə diskdə yığılmış fayllar olmaya bilər. İstifadəçilərin fərqinə varmadan prosessoru və operativ yaddaşı məşğul edən, hətta çox vaxt “faydalı” hesab edilən bəzi proqramlar sistemi demək olar ki, kilidləyir.

Valyuta.az xəbər verir ki, kompüterinizin performansını qorumaq üçün diskdəki fayl sıxlığından daha çox sistem resurslarını istismar edən arxa plan tətbiqlərinə diqqət yetirmək lazımdır. Köhnə tip sərt disklərdən fərqli olaraq, yeni nəsil SSD-lərdə boş sahənin azalması kompüteri birbaşa yavaşlatmır. Əsas problem, sizin xəbəriniz olmadan prosessoru və RAM-ı məşğul edən proqramlarda gizlənir. Aşağıda performans itkisinə səbəb olan və lazım gəldikdə silinməsi tövsiyə edilən tətbiqlər sadalanır.

Lazımsı təhlükəsizlik proqramları və antiviruslar

Bir çox istifadəçi hələ də üçüncü tərəf antivirus proqramlarının zəruri olduğuna inanır. Halbuki “Norton” və ya “McAfee” kimi məşhur proqramlar arxa planda daimi fayl yoxlaması apararaq prosessoru ciddi şəkildə yükləyir. Müasir “Windows” versiyalarında mövcud olan “Windows Defender” isə artıq təkbaşına tam funksional qoruma təmin edir. Sistemə inteqrasiya olunmuş şəkildə işlədiyi üçün kompüteri yavaşlatmadan təhlükəsizliyi qoruyur. Peşəkar zərurət olmadıqda əlavə antivirus proqramları yalnız sistemə əlavə yük yaradır.

Ekran alətləri və “overlay” tətbiqləri

Oyun zamanı kadr sürətini və ya temperaturu göstərən “Xbox Game Bar” və “Nvidia” kimi tətbiqlərin ekran panelləri göründüyündən daha riskli ola bilər. Bu panellər bağlanmış kimi görünsə də, arxa planda qrafik məlumatların emalını davam etdirir. Əgər həmin anda test aparılmırsa və bu göstəricilərə ehtiyac yoxdursa, funksiyaların deaktiv edilməsi sistemin daha rahat işləməsinə imkan verir.

Brauzerdə yığılan tablar

Veb brauzerlər artıq kompüterlərdə ən çox RAM istifadə edən proqramlara çevrilib. Xüsusilə onlarla tabın eyni vaxtda açıq qalması, hər birinin ayrıca yaddaş sahəsi tutmasına səbəb olur. Arxa planda açıq qalan video və ya musiqi tabı isə təkcə RAM-i deyil, prosessoru da davamlı məşğul edir. İstifadə edilməyən tabları bağlamaq vərdişi kompüterin sürətini birbaşa artırır.

Oyun platformaları və işə salma proqramları

“Steam”, “Epic Games” və “Battle.net” kimi platformalar oyun həvəskarları üçün əvəzolunmazdır. Lakin bu tətbiqlərin çoxu kompüter açılan kimi avtomatik işə düşür. Pəncərə bağlansa belə, sistem tepsisində işləməyə və yeniləmələr yükləməyə davam edirlər. Parametrlərdən “kompüter açılışında işə sal” seçimini deaktiv etmək və istifadə bitdikdən sonra proqramdan tam çıxmaq oyun və ümumi sistem performansını nəzərəçarpacaq dərəcədə yaxşılaşdırır.

İstehsalçı proqramları və “bloatware” təhlükəsi

Yeni noutbuk alındıqda “Dell”, HP və ya “Lenovo” kimi istehsalçıların öz proqramlarının əvvəlcədən quraşdırıldığı müşahidə olunur. “Sistem sağlamlığı” və ya “yeniləmə nəzarəti” adı ilə təqdim edilən bu proqramların gördüyü işlərin böyük hissəsini “Windows” artıq öz daxilində həyata keçirir. Bu tətbiqlər təkcə lazımsız yer tutmur, eyni zamanda daim məlumat toplayaraq internet trafiki və prosessor resurslarından istifadə edir. Rəsmi görkəmli, lakin funksional dəyəri az olan bu proqramların silinməsi ən məntiqli addım hesab olunur.

RGB işıqlandırma idarəetmə proqramları

İşıqlı klaviatura və siçanlar estetik baxımdan cəlbedici olsa da, onları idarə edən proqramlar, məsələn “Razer Synapse”, çox vaxt zəif optimallaşdırılır. Sadəcə işıq effektini dəyişmək üçün bu proqramların yüksək həcmdə RAM istifadə etməsi, xüsusilə oyun zamanı ani donmalara səbəb ola bilər. Kompüter güclü deyilsə, işıqlandırmanı standart rejimdə saxlayıb bu proqramları sistemdən silmək performansı qorumağa kömək edir.

Bulud ehtiyat nüsxələmə xidmətləri

“OneDrive” və “Google Drive” kimi xidmətlər faylları qorumaq üçün diski davamlı olaraq skan edir. Faylda ən kiçik dəyişiklik olduqda belə sinxronizasiya prosesi dərhal başlayır. Böyük qovluqlar daimi ehtiyat nüsxələmə siyahısında saxlanıldıqda, bu proses internet bağlantısı və prosessor üçün dar boğaz yarada bilər. Yalnız vacib faylların sinxronlaşdırılması və ya bu funksiyanın əl ilə idarə olunması kompüterin daha rahat işləməsini təmin edir.

Paşa Məmmədli