Keçmiş NASA alimi fizika qanunlarını pozan mühərrik yaratdığını iddia edir

Keçmiş NASA alimi və “Exodus Propulsion Technologies” şirkətinin həmtəsisçisi Çarlz Buxler Yer cazibəsinə qarşı çıxmağın yolunu taparaq faktiki olaraq fizika qanunlarını pozduğunu iddia edib. 

Valyuta.az xəbər verir ki, onun sözlərinə görə, komandasının aşkar etdiyi yeni mexanizm elektrostatik asimmetriyaya əsaslanan “yeni bir qüvvə” üzərində qurulub. Bu barədə “Indian Defence Review” nəşri məlumat yayıb.

“The Debrief” nəşrinə verdiyi müsahibədə Çarlz Buxler bildirib ki, komandası yanacaq istifadə etmədən itələmə qüvvəsi yarada bilən bir mühərrikin konseptini formalaşdırmağa nail olub. Alimin sözlərinə görə, bu nailiyyət ilkin mərhələdə cüzi nəticələr verən qurğular üzərində aparılan uzun illər davam edən sınaqlardan sonra əldə edilib.

Buxler etiraf edib ki, həlledici dönüş nöqtəsi 2023-cü ildə baş verib. Məhz həmin dövrdə elektrostatik xüsusiyyətlərdən istifadə edən bir konfiqurasiyanın ölçülə bilən itələmə qüvvəsi yaratdığı müşahidə olunub.

“Əslində biz aşkar etdik ki, elektrostatik təzyiqdə asimmetriya və ya hər hansı elektrostatik divergensiya sahəsi olan sistemlər kütlə mərkəzinə sıfırdan fərqli qüvvə komponenti verə bilir”, deyə Buxler izah edib.

Alim əlavə edib ki, bu yeni mexanizm obyektin hər hansı maddə (yanacaq, qaz və s.) buraxmadan, yalnız kütlə mərkəzini dəyişməklə hərəkət etməsinə imkan yaradır. Nəşrdə qeyd olunur ki, əgər bu prinsip təsdiqlənsə, müasir fizika üçün ciddi bir dönüş nöqtəsi olacaq və kosmik uçuşlar sahəsində tamamilə yeni imkanlar aça bilər.

Bununla yanaşı vurğulanır ki, Buxlerin komandası tərəfindən hazırlanmış mexanizm hələ də müstəqil yoxlamalara ehtiyac duyur. Komandanın nüfuzundan asılı olmayaraq, elmi metod iddiaların təkrarolunan nəticələrlə sübut edilməsini tələb edir. Xüsusilə mövcud fizika qanunlarına meydan oxuyan iddialar bu baxımdan daha ciddi yoxlanılmalıdır.

Paşa Məmmədli