"Nvidia" böhrana görə 5 il əvvəl buraxılmış videokartları yenidən satışa çıxaracaq

"Nvidia" 2026-cı ilin birinci rübündə 8 GB videoyaddaşa malik "GeForce RTX 3060" videokartlarının istehsalını bərpa etməyi planlaşdırır. Şirkət bununla yaddaş çiplərinin bahalaşması fonunda yaranmış videokart çatışmazlığı problemini həll etməyi hədəfləyir.

Valyuta.az xəbər verir ki, bu barədə ITHome portalı yazır.

Daha əvvəl istehsalın bərpası ilə bağlı şayiələr yayılmışdı, lakin hansı konfiqurasiyadan söhbət getdiyi dəqiqləşdirilmirdi. "RTX 3060" iki versiyada – 8 və 12 GB videoyaddaşla buraxılmışdı və son məlumatlara görə, məhz daha zəif, 8 GB-lıq versiya nəzərdə tutulur.

Bildirilir ki, "Nvidia" yalnız GPU çiplərini təqdim edəcək, tərəfdaşlar isə GDDR6 yaddaşı özləri ayrıca almalı olacaqlar. "GeForce RTX 3060" 2021-ci ildə təqdim edilib və hələ də "Steam" istifadəçiləri arasında ən populyar videokart olaraq qalır. Onun istehsalı 2024-cü ilin yayında dayandırılmışdı.

8 GB yaddaşa malik "RTX 3060" videokartlarının kütləvi istehsalı 2026-cı ilin birinci rübündə başlayacaq, lakin ilk məhdud partiyalar artıq yanvarın sonuna qədər satışa çıxa bilər. Gözlənilir ki, qiymətlər əvvəlki səviyyədə – təxminən 300 ABŞ dolları civarında qalacaq.

Paşa Məmmədli