İşçilər iş yerində kamera və səs yazısı ilə izlənilə bilərmi? - Hüquqşünas açıqladı

Əmək münasibətlərinin formalaşdığı müasir iş mühitində nəzarət və təhlükəsizlik anlayışları getdikcə daha çox müzakirə mövzusuna çevrilir. Texnologiyanın sürətli inkişafı iş proseslərinin idarə olunmasında yeni imkanlar yaratmaqla yanaşı, işçilərin şəxsi məkanına müdaxilə məsələlərini də gündəmə gətirir. Xüsusilə iş yerlərində kamera nəzarəti və səs yazma praktikaları bir tərəfdən işəgötürənlərin maraqlarını, digər tərəfdən isə işçilərin hüquq və məxfiliyini balanslaşdırmaq zərurətini ortaya çıxarır.

Bəs iş yerində işçinin kamera və səs yazma vasitəsilə izlənməsi qanunvericiliyə nə dərəcədə uyğundur?

Vəkillər Kollegiyasının üzvü Rəşad Əliyev Valyuta.az-a açıqlamasında bildirib ki, hər kəsin şəxsi və ailə həyatına qanunsuz müdaxilədən müdafiə hüququ qanunvericilikdə təsbit edilib:

"Şəxsin razılığı olmadan şəxsi həyatı haqqında məlumatın toplanılması, saxlanılması, istifadəsi və yayılması yolverilməzdir. Bu məsələ Azərbaycan Respublikası Konstitusiyasının 32-ci maddəsində – şəxsi toxunulmazlıq hüququ çərçivəsində tənzimlənir. Həmin maddəyə əsasən, qanunla müəyyən edilmiş hallar istisna olmaqla, heç kəs onun xəbəri olmadan və ya etirazına baxmayaraq izlənilə, video və foto çəkilişinə, səs yazısına və digər bu kimi hərəkətlərə məruz qoyula bilməz".

O əlavə edib ki, iş yerlərində, o cümlədən ofislərdə təhlükəsizlik kameralarının quraşdırılması zamanı işçilər bu barədə əvvəlcədən məlumatlandırılmalıdır. Həmçinin həmin görüntülərdən və ya səs yazılarından qanunsuz istifadə, onların yayılması şəxsi həyatın toxunulmazlığının pozulması hesab olunur və bu hal cinayət məsuliyyəti yaradır:

"Azərbaycan Respublikası Cinayət Məcəlləsinin 156-cı maddəsinə əsasən, şəxsi və ailə həyatına dair məlumatların, bu məlumatları əks etdirən sənədlərin yayılması, satılması və ya digər şəxslərə verilməsi qanunsuz sayılır. Bu əməlləri törədən şəxslər 1000 manatdan 2000 manatadək cərimə, 240 saatdan 480 saatadək ictimai işlər və ya 1 ilədək müddətə islah işləri ilə cəzalandırıla bilər".

"Əgər həmin əməllər vəzifəli şəxs tərəfindən qulluq mövqeyindən istifadə edilməklə və ya məsafədən idarə olunan pilotsuz uçuş aparatları vasitəsilə törədilərsə, həmin şəxs 3 ilədək müəyyən vəzifə tutma və ya fəaliyyətlə məşğul olma hüququndan məhrum edilməklə və ya edilməməklə 2 ilədək müddətə azadlığın məhdudlaşdırılması və ya 1 ilədək müddətə azadlıqdan məhrum etmə ilə cəzalandırıla bilər"- deyə R.Əliyev qeyd edir.

Tənzilə Ağabalayeva