İş yerində siqaret fasilələri məhsuldarlığı azaldırmı?

Bir çox iş yerlərində əməkdaşların siqaret fasilələrindən istifadə etdiyi müşahidə olunur. Bəzi işçilər bu fasilələrin onlara qısamüddətli rahatlıq verdiyini, stressi azaltdığını və düşüncə prosesini asanlaşdırdığını iddia edirlər. Digər tərəfdən isə, siqaret fasilələrinin iş vaxtının bölünməsinə, diqqətin dağılmasına və ümumi vaxt idarəçiliyinin zəifləməsinə səbəb olduğu da müzakirə mövzusudur. İş yerində siqaret fasilələri məhsuldarlığı azaldırmı?

İnsan Resursları üzrə mütəxəssis Abid Səmədov Valyuta.az-a bildirib ki, iş yerində siqaret fasilələrinin məhsuldarlığa təsirini yalnız fərdi rahatlama prizmasından qiymətləndirmək düzgün yanaşma deyil: "Bəzi əməkdaşlar siqaret zamanı özlərini daha sakit və rahat hiss etsələr də, bu təsir əsasən psixoloji və müvəqqəti xarakter daşıyır. Siqaret fasilələri qısa müddətdə stress hissini azalda bilər, lakin bu rahatlama davamlı deyil və iş prosesində uzunmüddətli müsbət nəticə yaratmır".

A.Səmədov qeyd edib ki, tez-tez verilən siqaret fasilələri iş vaxtının parçalanmasına, iş axınının pozulmasına və diqqətin dağılmasına səbəb olur: "Hər fasilədən sonra əməkdaşın yenidən işə fokuslanması üçün əlavə vaxt tələb olunur ki, bu da gün ərzində ümumi effektivliyin azalması ilə nəticələnir. Xüsusilə diqqət, ardıcıllıq və konsentrasiya tələb edən tapşırıqlarda bu təsir daha aydın hiss olunur".

Ekspert uzunmüddətli təsirlərə də diqqət çəkərək vurğulayıb ki, siqaret çəkmək zamanla enerji səviyyəsində dalğalanmalara, tez yorulmaya və diqqət problemlərinə yol aça bilər: "Bu faktorlar isə iş performansının zəifləməsinə və görülən işin keyfiyyətinin aşağı düşməsinə səbəb olur: “Nəticə etibarilə, siqaret fasilələri qısamüddətli rahatlama effekti versə də, uzunmüddətli perspektivdə əməkdaşın məhsuldarlığına və ümumi iş effektivliyinə mənfi təsir göstərmə ehtimalı daha yüksəkdir".

Sərvanə Rəmixanova