“Bank Respublika”nın nağd vəsaitləri 23% azalıb

“Bank Respublika” 2025-ci ilin IV rübünü 60,6 milyon manat xalis mənfəətlə başa vurub ki, bu da ötən ilin eyni dövrü ilə müqayisədə 10 milyon manat və ya 19,8% artım deməkdir.

Valyuta.az xəbər verir ki, mənfəətdəki artıma baxmayaraq, faiz xərcləri və öhdəlikləri yüksəlib.

Hesabat dövründə bankın faiz gəlirləri 299,6 milyon manat təşkil edib. Bu göstərici ötən illə müqayisədə 25,9% və ya 61,6 milyon manat artıb. Eyni zamanda, faiz xərcləri də 35,5% artaraq 129,8 milyon manata yüksəlib. Bu artım əsasən cəlb edilmiş kreditlərə görə ödənilən faizlər hesabına baş verib. Bu istiqamətdə xərclər 82,1% artaraq 68,7 milyon manata çatıb. Depozitlər üzrə faiz xərcləri isə 5,1% artaraq 55,2 milyon manat təşkil edib.

Qeyri-faiz xərcləri də əvvəlki illə müqayisədə artaraq 127,7 milyon manata çatıb. Bu, 2024-cü ilin müvafiq göstəricisindən 16,2 milyon manat və ya 14,6% çoxdur.

2025-ci ilin sonuna bankın cəmi aktivləri 2 milyard 725 milyon manata çatıb. Bu göstərici illik müqayisədə 549 milyon manat və ya 25,2% artım deməkdir. Aktivlərin artmasına baxmayaraq, nağd vəsaitlər və onların ekvivalentləri üzrə göstərici 374,6 milyon manata düşüb. Bu, əvvəlki illə müqayisədə 112 milyon manat və ya 23,0% azalma deməkdir.

Cəmi öhdəliklər də artaraq 2 milyard 476 milyon manata çatıb - bu, illik müqayisədə 498 milyon manat və ya 25,2% artıb. Artım əsasən kredit təşkilatları və digər maliyyə institutları qarşısında öhdəliklər üzrə qeydə alınıb. Bu istiqamətdə öhdəliklər 92,8% artaraq 1 milyard 9 milyon manata çatıb.

Bunun əksinə olaraq, fiziki şəxslərin depozitləri 5,1% azalaraq 603,7 milyon manata düşüb. 2024-cü ildə bu göstərici 636,2 milyon manat idi. 

Mayya Hüseynova