İnternetin köhnə nəhəngi yuxudan oyandı, geri döndü

Bir dövr internet dünyasına damğa vuran və sosial xəbər paylaşımının öncüllərindən hesab olunan “Digg” uzun fasilədən sonra yenidən fəaliyyətə başlayır. 

Valyuta.az xəbər verir ki, quruluş baxımından “Reddit”ə bənzəyən platforma çərşənbə günü etibarilə açıq beta versiyasını istifadəçilərin ixtiyarına verib. Artıq həm veb-sayt, həm də mobil tətbiq üzərindən “Digg” dünyasına qoşulmaq, icmalara üzv olmaq və məzmun istehsal etmək mümkündür. Platformada bir məzmunu bəyənib ön plana çıxarmaq üçün isə onu “qazmaq” (digging) tələb olunur.

"İnkişaf prosesi istifadəçilərlə birlikdə davam edəcək"

“Digg”in baş icraçı direktoru Castin Mezell beta mərhələsinin başlanması ilə bağlı açıqlamasında bu addımın prosesin sonu olmadığını vurğulayıb. Onun sözlərinə görə, açıq beta mərhələsinə keçid platformanın artıq hamının gözü önündə böyüməyə hazır olduğunu göstərir. Castin Mezell bildirib ki, xüsusiyyətlər sınaqdan keçirilir, istifadəçilər diqqətlə dinlənilir və məhsul onlarla birlikdə inkişaf etdirilir. O qeyd edib ki, bu yalnız başlanğıcdır və daxil olan rəylər “Digg”in gələcək istiqamətini müəyyənləşdirəcək.

Tanış adların iddialı tərəfdaşlığı

Yenilənmiş “Digg”in arxasında texnologiya dünyası üçün kifayət qədər tanış simalar dayanır. Platformanın orijinal qurucusu Kevin Rouz və “Reddit”in təsisçilərindən biri olan Aleksis Ohanyan birləşərək “Digg”in yeni dövründə mülkiyyət sahiblərinə çevriliblər. Bu tərəfdaşlığın sosial forumlar və xəbər paylaşımı sahəsində ciddi rəqabət yaradacağı gözlənilir. İstifadəçi mərkəzli bir struktur qurmağı hədəfləyən komanda keçmişin populyar ruhunu müasir dövrün tələbləri ilə uzlaşdırmağı planlaşdırır.

Paşa Məmmədli