İnsan resursları mütəxəssislərindən işdən çıxarılanlara dörd məsləhət

İşdən azad olunmaq şəraitdən asılı olaraq müxtəlif hisslər yarada bilər. Bəzi hallarda bu, sevinc və azadlıq duyğusu gətirir, digər hallarda isə depressiyanın başlanğıcına çevrilə bilər. Hər iki halda bu, həyatın kifayət qədər adi bir epizodu olsa da, gələcək karyera üçün problemə çevrilməməsi adına bəzi əsas davranış qaydalarına riayət etmək vacibdir.

Valyuta.az xəbər verir ki, “Business Insider” nəşri işdən könüllü ayrılan və ya işdən çıxarılan şəxslərin necə davranmalı olduqlarını öyrənmək üçün bir sıra İnsan resursları mütəxəssisləri ilə danışıb.

Sakitliyinizi qoruyun

Əgər işdən azad olunma gözlənilməz şəkildə baş veribsə və aylar əvvəl planlaşdırılmayıbsa, bu vəziyyət emosional qərar və davranışlara səbəb ola bilər ki, bu da gələcək karyeraya zərər vura bilər.

“Kadima Careers” karyera xidmətinin baş direktoru Alan Ştayn “körpüləri yandırmamağı” və nə qədər əsəbi olsanız belə, həmkarlar və rəhbərliklə “yaxşı münasibətlər” saxlayaraq işdən ayrılmağı tövsiyə edir.

“Dünya kiçikdir və karma realdır. Emosiyaların sizə qalib gəlməsinə imkan verməyin”, deyə o bildirib.

Özünüzə toparlanmaq üçün vaxt verin

Karyera kouçu Steysi Perkins yeni iş axtarışına başlamazdan əvvəl əvvəlki iş yeri ilə psixoloji olaraq vidalaşmağı və bu vəziyyətin niyə baş verdiyi barədə nəticələr çıxarmağı tövsiyə edir.

Bununla yanaşı, mütəxəssislər bu mərhələdə həddindən artıq ilişib qalmamağı məsləhət görürlər ki, bu hal depressiyaya yol açmasın.

Alan Ştayn hesab edir ki, yeni iş axtarışına işdən ayrıldıqdan təxminən bir ay sonra başlamaq daha məqsədəuyğundur. Onun fikrincə, bir ay nə altı ay qədər uzun, nə də 45 dəqiqə qədər tələsikdir.

Yeni iş axtarışına sistemli yanaşın

İstirahət etdikdən sonra karyera hədəflərinizi və perspektivlərinizi təhlil edin, CV-nizi yeniləyin və onu uyğun yerlərə göndərməyə başlayın.

Mütəxəssislər yeni iş tapmaq üçün şəxsi və peşəkar əlaqələr şəbəkəsindən istifadə etməkdən çəkinməməyi məsləhət görür.

Bu dövr eyni zamanda ixtisasartırma üçün qısa kurslar keçmək baxımından da əlverişlidir. Məsələn, neyroşəbəkələrlə işləmək bacarıqlarını öyrənməyi uzun müddət təxirə salmısınızsa, indi bunun üçün uyğun vaxtdır.

İşdən çıxarılma səbəbi ilə bağlı izah hazırlayın

İşdən azad olunmaq hökm deyil və buna görə utanmağa əsas yoxdur. Lakin müsahibə zamanı demək olar ki, mütləq bu qərarın səbəbi soruşulacaq. Buna görə də potensial yeni işəgötürəni qorxutmayacaq əvvəlcədən hazırlanmış cavabın olması vacibdir.

Mütəxəssislər ilk növbədə açıq-aşkar yalandan çəkinməyi tövsiyə edir, çünki bu, asanlıqla üzə çıxa bilər. Eyni zamanda əvvəlki işəgötürəni sərt şəkildə tənqid etmək də məsləhət görülmür. İşdən çıxarılmanın səbəbləri ilə bağlı həddindən artıq detallara varmaq etik baxımdan doğru sayılmır və bu, yalan danışdığınız təəssüratını yarada bilər.

“Ümumilikdə belə demək yaxşı ideyadır: ‘Sadəcə olaraq başqa bir şey axtarırdım. Məqsədlərimə daha uyğun olan bir istiqamət tapmaq istəyirdim’”, deyə “Lee Hecht Harrison” şirkətinin prezidenti Con Morqan bildirib.

Paşa Məmmədli