İlon Maskdan qalmaqallı çağırış: “ChatGPT-dən uzaq durun”

Milyarder sahibkar İlon Mask süni intellekt əsaslı chatbot "OpenAI"nin məhsulu olan "ChatGPT" ilə bağlı iddiaları yenidən gündəmə gətirib.

Valyuta.az xəbər verir ki, Mask sosial şəbəkədə "chatbot"un bir sıra ölüm halları, o cümlədən intiharlarla əlaqələndirildiyini iddia edib və istifadəçiləri bu platformadan uzaq durmağa çağırıb.

Paylaşımda iddia olunur ki, "ChatGPT"nin istifadəsi ilə əlaqəli ümumilikdə 9 ölüm halı qeydə alınıb, onlardan 5-də qarşılıqlı əlaqələrin intihara səbəb olduğu bildirilir. Lakin "Forbes" bu statistikanı müstəqil şəkildə təsdiqləyə bilmədiyini, məlumatın mənbəsinin təqdim olunmadığını qeyd edib.

Bundan bir neçə saat sonra Sam Altman məsələ ilə bağlı açıqlama verərək vəziyyəti “faciəvi və mürəkkəb” adlandırıb. Altman cavabında Maska məxsus "Grok" adlı "chatbot"u və "Tesla"nın "Autopilot" funksiyasını tənqid edib. O bildirib ki, "Autopilot" sistemi ilə bağlı baş verən qəzalarda onlarla insan həyatını itirib və bu texnologiyanın təhlükəsizliyi sual altındadır.

Altmanın sözlərinə görə, o, "Autopilot" funksiyası aktiv olan avtomobildə cəmi bir dəfə səfər edib və həmin vaxt bu sistemin istifadəyə verilməsinin təhlükəsiz olmadığı qənaətinə gəlib. Mask isə uzun müddətdir "Autopilot"un insan səhvlərini azaltdığını və həyatları xilas etdiyini iddia edir.

Qeyd edək ki, "Tesla" bu yaxınlarda tam avtonom idarəetmə (FSD) xidmətinin birdəfəlik 8 min dollarlıq satış modelindən aylıq abunə sisteminə keçəcəyini açıqlayıb.

Məsələ ilə bağlı "National Highway Traffic Safety Administration"ın (NHTSA) 2024-cü il hesabatında "Tesla"nın "Autopilot" sisteminin son illərdə təxminən 1 000 yol qəzası ilə əlaqələndirildiyi, bu hadisələrdən 20-dən çoxunun ölümlə nəticələndiyi bildirilir. Araşdırmalara əsasən, qəzaların əksəriyyətində sürücülərin diqqətsizliyi və texnologiyanı tam avtonom sistem kimi qəbul etməsi əsas rol oynayıb.

Qeyd edək ki, Mask və Altman arasındakı qarşıdurma "OpenAI"nin 2015-ci ildə təsis edildiyi dövrdən başlayır. Mask 2018-ci ildə təşkilatın idarə heyətindən ayrılıb və sonradan şirkətin kommersiya yönümlü modelə keçməsini tənqid edib. Altman isə bu dəyişikliyin qabaqcıl süni intellekt tədqiqatlarının maliyyələşdirilməsi üçün zəruri olduğunu bildirib.

Sərvanə Rəmixanova