İlon Mask gələn il "Optimus" robotunu bazara çıxaracaq

"Tesla"nın qurucusu və baş icraçı direktoru İlon Mask, şirkətin insansı robotu "Optimus"un gələn ilin sonuna qədər bazara çıxarılmasının planlaşdırıldığını bildirib.

Valyuta.az xəbər verir ki, Mask bu açıqlamanı Dünya İqtisadi Forumu çərçivəsində Davosda keçirilən tədbirdə çıxışı zamanı səsləndirib.

Onun sözlərinə görə, Optimus robotları artıq "Tesla" fabrikalarında bəzi sadə və təkrarlanan işləri yerinə yetirməyə başlayıb. Lakin bu iddiaları təsdiqləyən müstəqil sübutlar hələlik ictimaiyyətə təqdim olunmayıb.

Qeyd edək ki, daha əvvəl "Optimus"un nümayiş olunduğu bəzi təqdimatlarda robotların uzaqdan insan operatorlar tərəfindən idarə edildiyi iddiaları gündəmə gəlmişdi. Elon Mask isə bildirib ki, "Optimus" yalnız yüksək təhlükəsizlik, etibarlılıq və funksionallıq səviyyəsinə çatdıqdan sonra satışa çıxarılacaq.

Açıqlamadan sonra "Tesla" şirkətinin səhmlərində artım müşahidə olunub. Mask eyni zamanda sükan və pedal olmadan dizayn edilmiş, iki nəfərlik "Cybercab" modelinin aprel ayında istehsala başlayacağını və illik istehsal həcminin 2 milyon ədədə çatdırılmasının hədəfləndiyini də açıqlayıb. Lakin "Optimus" və "Cybercab" layihələrinin hansı mərhələdə və hansı miqyasda reallaşacağı ilə bağlı əlavə detallar paylaşılmayıb.

Xatırladaq ki, "Optimus" təxminən 1,7 metr boyunda və 56 kiloqram çəkidə insansı robot kimi dizayn edilib. "Tesla" bu robotu əsasən monoton, təkrarlanan və riskli işlərin icrası üçün hazırlayır. Adını “Transformers” seriyasındakı "Optimus Prime" obrazından alan robot ilk dəfə 2021-ci ildə “Tesla Bot” adı ilə ictimaiyyətə təqdim olunub.

Sərvanə Rəmixanova