"ClickHouse" 400 milyon dollar investisiya alıb

ABŞ mərkəzli “ClickHouse” real vaxt rejimində analitik verilənlər bazası sahəsində fəaliyyətini genişləndirmək məqsədilə 400 milyon dollar həcmində D seriyası investisiya cəlb edib. 

Valyuta.az xəbər verir ki, bu raunddan sonra “ClickHouse”un bazar dəyəri 15 milyard dollara yüksəlib.

Şirkət bildirir ki, yeni vəsait qlobal miqyasda böyümənin sürətləndirilməsi, LLM (Large Language Model) müşahidəolunmasının təkmilləşdirilməsi və süni intellekt tərtibatçıları üçün vahid məlumat infrastrukturunun yaradılması üçün istifadə olunacaq.

“ClickHouse” 2021-ci ildə Aleksey Milovidov, Aaron Kats və Yuri İzraylevski tərəfindən təsis edilib. Şirkət böyük həcmli məlumatlar üzərində yüksək sürətli real vaxt analitikası aparmağa imkan verən məhsuldar verilənlər bazası həlli təqdim edir.

Platforma tətbiqlərdən, sistemlərdən və süni intellekt modellərindən daxil olan məlumatların dərhal sorğulanmasını təmin edir. Xüsusilə müşahidəolunma, məlumat anbarı (data warehouse), AI/ML və LLM əsaslı tətbiqlər üçün miqyaslana bilən infrastruktur təklif edən “ClickHouse” həm bulud, həm də lokal (on-premise) mühitlərdə fəaliyyət göstərir. Aşağı gecikməli böyük həcmli məlumat emalı müəssisələrə real vaxtda qərarvermə imkanı yaradır.

Hazırda “ClickHouse Cloud” üzərindən 3 mindən çox müştəriyə xidmət göstərən şirkətin istifadəçiləri arasında “Meta”, “Sony”, “Tesla” və “OpenAI” kimi beynəlxalq texnologiya şirkətləri də yer alır.

Mayya Hüseynova