"ChatGPT"də reklamlar necə yayımlanacaq?

Süni intellekt şirkəti "OpenAI" "ChatGPT" platformasında reklamların tətbiqi ilə bağlı planlarını daha aydın şəkildə açıqlayıb.

Valyuta.az xəbər verir ki, şirkətin son bloq paylaşımında reklamların hansı abunə planlarında görünəcəyi, istifadəçi məlumatlarının necə qorunacağı və reklamların cavablara təsir edib-etməyəcəyi kimi vacib məsələlərə aydınlıq gətirilib.

Hansı "ChatGPT" planlarında reklam olacaq?

"OpenAI" bildirib ki, ABŞ-da pulsuz və Go abunə planlarında reklamların sınaqdan keçirilməsi nəzərdə tutulur. Məqsəd daha çox istifadəçiyə pulsuz və ya aşağı limitli giriş imkanı yaratmaqdır. Plus, Pro, Business və Enterprise abunəçilərinə isə reklam göstərilməyəcək.

Reklamlar "ChatGPT" cavablarına təsir edəcəkmi?

Şirkət vurğulayır ki, reklamlar "ChatGPT"nin istifadəçilərə verdiyi cavablara təsir göstərməyəcək. Cavablar həmişə istifadəçi üçün ən faydalı məzmun əsasında formalaşacaq, reklamlar isə ayrıca və açıq şəkildə etiketlənəcək.

İstifadəçi söhbətləri reklamverənlərə ötürüləcəkmi?

"OpenAI" açıqlayıb ki, "ChatGPT" söhbətləri və istifadəçi məlumatları reklamverənlərə satılmayacaq. Şirkət bildirir ki, platformaya olan etimadın qorunması əsas prioritetdir və cavablar yalnız obyektiv faydalı məlumatlar əsasında yaradılacaq.

Reklamlar üçün istifadəçi məlumatları necə idarə olunacaq?

"OpenAI"nin məlumatına görə, istifadəçilər reklamlar üçün məlumatların istifadəsini özləri idarə edə biləcək. Şəxsi reklamlaşdırmanı deaktiv etmək və istifadə olunan məlumatları silmək mümkün olacaq. Reklam görmək istəməyənlər üçün isə hər zaman reklamsız ödənişli plan seçimi mövcud olacaq.

Reklamlar nə vaxt tətbiq olunacaq?

Hazırda reklamlar aktiv deyil. Lakin "OpenAI" yaxın həftələrdə ABŞ-da 18 yaşdan yuxarı pulsuz və Go planlı istifadəçilər üzərində testlərə başlamağı planlaşdırır.

Reklamlar kimlərə göstərilməyəcək?

Test mərhələsində 18 yaşdan aşağı olduğu bildirilən və ya bu ehtimal edilən istifadəçilərə reklam göstərilməyəcək. Eyni zamanda reklamlar sağlamlıq, psixi sağlamlıq və siyasi məzmun kimi həssas mövzuların yanında yer almayacaq.