Cənubi Koreya çip və süni intellektə 576 milyard dollar ayırır

Cənubi Koreya Prezidenti Li Çje Myon iri çip və süni intellekt layihələrinin icrasına mümkün qədər tez başlanılması barədə göstəriş verib.

Valyuta.az xəbər verir ki, prezident çıxışı zamanı icazələrin alınması, torpaq sahələrinin ayrılması, eləcə də elektrik və su təchizatında yaranacaq gecikmələrin ölkənin yüksək texnologiyalar sahəsində qlobal liderlik hədəfinə mane ola biləcəyini bildirib:

"Hazırkı şəraitdə nəticəni daha sürətli hərəkət edən və liderliyi ilk əldə edən tərəf müəyyən edəcək. Yeganə vacib amil sürətdir".

Prezident qeyd edib ki, "Yonqin" sənaye kompleksində layihənin təsdiqindən tikintinin başlanmasına qədər altı il keçməsi nisbətən sürətli hesab olunsa da, ətraf mühitə təsirin qiymətləndirilməsi və digər təsdiq prosedurlarının mümkün olan hallarda qısaldılması vacibdir. Onun sözlərinə görə, indiyədək ardıcıl icra olunan proseslər bundan sonra paralel şəkildə həyata keçirilməlidir.

Li həmçinin çip istehsalı layihələri üçün sabit elektrik və su infrastrukturunun əvvəlcədən təmin edilməsinin vacibliyini vurğulayıb. O bildirib ki, bərpa olunan enerji istehsalı artsa da, şirkətlər əsas enerji təchizatı ilə bağlı narahatlıqlarını hökumətə çatdırırlar və bu problemlər əvvəlcədən həll edilməlidir.

Xatırladaq ki, Cənubi Koreya ötən həftə çip və süni intellekt sənayeləri də daxil olmaqla, ümumi dəyəri 576 milyard ABŞ dollarını aşan investisiya proqramını açıqlayıb.

Proqram ölkənin bu sahələrdə qlobal liderliyini gücləndirməyi və iqtisadi inkişafı Seul metropolitenindən kənar regionlara yaymağı hədəfləyir.

Proqrama əsasən, "Samsung Electronics" və "SK Hynix" şirkətlərinin hər biri ölkənin cənub-qərbində yeni çip istehsalı müəssisələrinin tikintisinə 400 trilyon von (təxminən 260 milyard ABŞ dolları) investisiya yatıracaq. Bundan başqa, "Çunqçonq" bölgəsində çiplərin qablaşdırılması üzrə sənaye klasterinə daha 81 trilyon von investisiya qoyulması nəzərdə tutulur.

Rəfiqə Abdin