C.Bezosun keçmiş həyat yoldaşı 26 milyard vəsait bağışlayıb

"Amazon"un qurucusu Ceff Bezosun keçmiş həyat yoldaşı Makkenzi Skott xeyriyyəçilik sahəsində qeyri-adi yanaşması ilə diqqət çəkir. Onun indiyədək 26 milyard dollardan çox vəsaiti müxtəlif təşkilatlara bağışladığı və bunun xeyriyyəçilik modelini dəyişdirdiyi bildirilir. 

Valyuta.az xəbər verir ki, 2019-cu ildən bəri Makkenzi Skott 2450-dən çox təşkilata ümumilikdə 26 milyard dollardan artıq vəsait bağışlayıb.

"Native Forward" təşkilatının rəhbəri Ancelik Albert “Confidential” (Məxfi) başlıqlı elektron məktubu ilk dəfə alanda buna inanmaqda çətinlik çəkib. Məktubda Makkenzi Skottun onun qeyri-kommersiya təşkilatına heç bir müraciət və ya sorğu olmadan 20 milyon dollar bağışladığı qeyd olunurdu. Üç il sonra isə daha bir müəmmalı məktub gəlib və bu dəfə sürpriz daha böyük olub: 50 milyon dollar.

Ənənəvi donorlar adətən ətraflı layihə təklifləri və ciddi nəzarət tələb etdiyi halda, Skott sadəcə çek yazır və prosesi bununla tamamlayır. Yardım alan təşkilatlardan birinin nümayəndəsinin sözlərinə görə, “o, ABŞ-da xeyriyyəçilik anlayışını yenidən yazır”.

Skott heç bir müraciət prosesi, təqdimat görüşləri və ya əlavə şərtlər tələb etmir. O, əvvəlcə qeyri-kommersiya təşkilatlarını müəyyən etmək üçün “sakit araşdırma” aparır, daha sonra isə 300 min dollardan 80 milyon dollara qədər dəyişən qrantlarla onları gözlənilmədən sevindirir. Bir çox təşkilat isə əvvəlcə onun göndərdiyi elektron məktubları spam hesab edərək diqqətdən kənarda qoyur.

Tənzilə Ağabalayeva