"Bitwise" rəhbərindən kriptovalyuta bazarında yüksəliş üçün 3 əsas şərt

Kriptovalyuta bazarları 2026-cı ilə müsbət dinamika ilə başlasa da, "Bitcoin"in 94 min dollar səviyyəsində geri dönməsi artım tempinin asan olmayacağını göstərib.

Valyuta.az xəbər verir ki, aktivlərin idarə edilməsi üzrə aparıcı şirkətlərdən biri olan "Bitwise Asset Management"in qlobal investisiya direktoru Matt Hougan bu il bazarda davamlı yüksəlişin mümkün olması üçün üç əsas amilin önə çıxdığını bildirib.

Hougan bazarda qeydə alınan son enişdən sonra "Bitwise" müştəriləri üçün hazırladığı analitik qeyddə vurğulayıb ki, bu risklərdən biri artıq aradan qalxıb.

“Üç maneə var, biri artıq aradan qalxıb”

Houganın sözlərinə görə, 2026-cı ildə kriptovalyuta bazarında sağlam yüksəlişin baş verməsi üçün aşağıdakı istiqamətlərdə irəliləyiş vacibdir.

1. Kəskin enişlərin təkrarlanmaması

Onun fikrincə, oktyabr ayındakı kəskin geriləmə tipli proses yenidən yaşanmamalıdır: “Əgər belə bir eniş baş verəcəkdisə, bunu artıq - xüsusən ilin sonuna yaxın müşahidə edərdik. Amma bu baş vermədi. Düşünürəm ki, bu risk artıq aradan qalxıb,” - deyə Hougan qeyd edib.

2. Tənzimləyici çərçivənin formalaşması

İkinci əsas məqam kripto bazarı üçün hüquqi aydınlığın təmin olunmasıdır. Hougan bildirib ki, Clarity Act və bazar strukturu ilə bağlı qanun layihələri üzrə müzakirələr yaxın günlərdə Senatda başlayacaq: “Bu sənədlərin 2026-cı ildə Konqresdən keçməsi bazar üçün kritik əhəmiyyət daşıyır. DeFi sahəsində maraqların toqquşması və ümumi razılaşmazlıqlar da daxil olmaqla bir sıra mühüm mövzular müzakirə olunacaq,” - deyə o əlavə edib.

3. Qlobal səhm bazarlarında kəskin satışların olmaması

Ekspert vurğulayıb ki, kripto bazarının yüksəlməsi üçün səhm bazarlarının mütləq artım nümayiş etdirməsi şərt deyil. Lakin qlobal fond bazarlarında baş verə biləcək ciddi satış dalğası kriptovalyutalara da mənfi təsir göstərə bilər.

Matt Houganın fikrincə, qeyd olunan şərtlər təmin olunduğu təqdirdə, 2026-cı il kriptovalyuta bazarı üçün dayanıqlı artım və genişmiqyaslı yüksəliş dövrü ilə yadda qala bilər.