Bir işçiyə bir neçə iş yükləmək qanunidir?

Marketə daxil olursunuz, kassaya yaxınlaşırsınız, amma kassir yerində yoxdur. Bir neçə dəqiqə gözlədikdən sonra məlum olur ki, o, eyni zamanda həm rəf düzür, həm də anbar işi görür. Bu mənzərə artıq adi hala çevrilib. Bəs bir işçinin eyni anda bir neçə işi görməyə məcbur edilməsi nə dərəcədə doğrudur? 

Əmək qanunvericiliyi üzrə ekspert Nüsrət Xəlilov Valyuta.az-a bildirib ki, bir işçinin bir neçə işi görməyə məcbur edilməsi təbii ki, heç bir halda düzgün addım deyil.

Onun sözlərinə görə, qanunvericilik baxımından bu məsələyə baxdıqda, bir işçinin əmək funksiyasında bir neçə vəzifənin müəyyən olunması konkret qadağa şəklində nəzərdə tutulmayıb.

Ekspert qeyd edib ki, iş yerlərində vəzifə bölgüsü mütləq olmalıdır və hər kəs öz vəzifə təlimatına, əmək funksiyasına uyğun işlər yerinə yetirməlidir.

Nüsrət Xəlilov diqqətə çatdırıb ki, Azərbaycan Respublikasının Əmək Məcəlləsinin 57-ci maddəsində bu məsələ aydın şəkildə əksini tapır: "İşəgötürən işçinin əmək funksiyasının - əmək müqaviləsində nəzərdə tutulan, bir və ya bir neçə vəzifə, ixtisas, yaxud peşə üzrə yerinə yetirməli olduğu müvafiq işin və ya göstərməli olduğu xidmətin dairəsini dəqiq və birmənalı müəyyən etməlidir".

Ekspertin sözlərinə görə, əgər bir işçi belə hallarla rastlaşırsa və eyni anda bir neçə işi görməyə məcbur edilirsə, o, əmək qanunvericiliyinə əməl olunmasına dövlət nəzarətini həyata keçirən orqana - Dövlət Əmək Müfəttişliyi Xidmətinə, eləcə də məhkəməyə müraciət edə bilər.

Sərvanə Rəmixanova