Amerikalı nazir: Qızıldakı dalğalanmanın arxasında çinli investorlar var

ABŞ xəzinə naziri Skott Bessent ötən həftə qızıl bazarında müşahidə olunan kəskin dalğalanmaların arxasında çinli investorların dayandığını bildirib.

Valyuta.az-ın məlumatına görə, Bessent qeyd edib ki, qızıldakı hərəkət bir qədər nəzarətdən çıxıb: "Çində təminat tələblərini sərtləşdirmək məcburiyyətində qaldılar. Bu mənə klassik spekulyativ partlayış kimi görünür".

“Fox News” kanalına ABŞ Mərkəzi Bankının (FED) siyasəti barədə danışan Bessent balansın kiçildilməsi istiqamətində addımların ehtiyatla atılacağını vurğulayıb: "Sürətli bir proses gözləmirəm. Onlar ample-regime siyasətinə keçiblər və bu, daha böyük balans tələb edir. Ən azı bir il gözləyib hansı istiqamətdə irəliləmək istədiklərinə qərar verəcəklər".

Bessent Donald Trampın FED sədrliyinə namizəd göstərdiyi Kevin Uorş barədə isə belə deyib: "O, müstəqil olacaq, lakin eyni zamanda ‘Fed’in Amerika xalqı qarşısında məsuliyyət daşıdığını da nəzərə alacaq".

Paşa Məmmədli