“Alibaba”da 1000-dən çox Azərbaycan məhsulu satılır

“Alibaba”da 1000-dən çox Azərbaycan məhsulu təqdim olunur

Valyuta.az xəbər verir ki, bu barədə “Azexport.az” portalının rəhbəri Ayxan Qədəşov Bakıda keçirilən Avrasiya Françayzinq Forumunda çıxışı zamanı məlumat verib.

O bildirib ki, “Azexport” artıq 10 ilə yaxındır fəaliyyət göstərir və bu müddət ərzində Azərbaycan məhsullarının beynəlxalq platformalarda təqdimatına mühüm töhfə verib: “Biz yerli sahibkarlarla mütəmadi görüşlər keçirdik, onlara elektron ticarətin sürətlə inkişaf etdiyini və bu imkanlardan necə faydalana biləcəklərini izah etdik. Sahibkarların maarifləndirilməsi istiqamətində ciddi işlər aparıldı. Pandemiya dövrü də elektron ticarətin inkişafına əlavə təkan verdi”.

Ayxan Qədəşovun sözlərinə görə, bu gün “Azexport”un dəstəyi və sahibkarların öz təşəbbüsü sayəsində platformalarda Azərbaycan məhsullarının sayı durmadan artır:
“2016-cı ildə “Alibaba”da cəmi 10-a yaxın məhsul təqdim olunmuşdu, hazırda isə 1000-dən çox Azərbaycan məhsulu bu platformada yer alır”.

“Alibaba”da tələbat olan Azərbaycan məhsulları qarışıqdır, amma ən çox aqrar sektorunun məhsullarına  tələbat var”, - deyə o əlavə edib.

Sərvanə Rəmixanova