"Google" və "Epic Games" arasında illərdir davam edən mübahisə bitdi

"Google" və "Epic Games" arasında uzun müddətdir davam edən hüquqi mübahisə razılaşma ilə nəticələnib.

Valyuta.az xəbər verir ki, yeni razılaşmaya əsasən, "Google Play Store"da tətbiqdaxili alışlar üzrə tətbiq edilən komissiya dərəcəsini azaldıb.

Məlumata görə, "Google" tətbiq tərtibatçılarından aldığı standart 30% komissiya siyasətindən imtina edərək bu göstəricini 20%-ə endirib. Şirkət qərarın rəsmi şəkildə qüvvəyə mindiyini açıqlayıb.

Razılaşmanın ən diqqət çəkən tərəflərindən biri isə məşhur "Fortnite" oyunu ilə bağlıdır. "Epic Games"in öz müstəqil ödəniş sistemini istifadə etmək istəyi ilə başlayan mübahisə nəticəsində oyun bir müddət "Play Store"dan çıxarılmışdı. Yeni razılaşmadan sonra "Fortnite" yenidən "Google Play Store" vasitəsilə "Android" istifadəçilərinə təqdim olunacaq.

Bundan əlavə, əldə olunan razılaşma Android ekosistemi üçün də mühüm dəyişikliklər gətirir. "Google" platformada üçüncü tərəf tətbiq mağazalarının fəaliyyətinə daha geniş imkan yaradacağını açıqlayıb. Bu isə "Android" sisteminin daha açıq və rəqabətli mühitə keçidini sürətləndirə bilər.

Ekspertlərin fikrincə, "Google"un bu addımı mobil tətbiq bazarında rəqabəti gücləndirə və uzun müddətdir müzakirə olunan inhisarçılıq iddialarını zəiflədə bilər. Yeni qərarın digər texnologiya şirkətlərinə necə təsir göstərəcəyi isə hələlik maraq doğuran əsas məsələlərdən biri olaraq qalır.

Sərvanə Rəmixanova