“Unleash” 35 milyon dollar investisiya alıb

Norveç mərkəzli yazılım platforması “Unleash” 35 milyon dollarlıq B seriyası investisiya turunu bağladığını açıqlayıb.

Valyuta.az xəbər verir ki, 2019-cu ildə təsis edilən şirkətin bu günə qədər cəlb etdiyi ümumi investisiya məbləği 51,5 milyon dollara çatıb.

Şirkət bildirib ki, yeni investisiya məhsul innovasiyalarını sürətləndirmək və qlobal miqyasda genişlənməni dəstəkləmək üçün istifadə olunacaq.

“Unleash” şirkəti İvar və Eqil Østhus qardaşları tərəfindən yaradılıb. Platforma şirkətlərin hazırladığı tətbiqlərə və proqram təminatına əlavə edilən yeni funksiyaların daha təhlükəsiz və nəzarətli şəkildə istifadəyə verilməsini təmin edən proqram platforması təqdim edir.

Platforma tərtibatçılara yeni funksiyaları bütün istifadəçilərə eyni anda təqdim etmək əvəzinə əvvəlcə kiçik istifadəçi qrupunda sınaqdan keçirməyə, müxtəlif versiyalar üzərində təcrübələr aparmağa və performansı ölçməyə imkan verir.

Bu yanaşma şirkətlərə mümkün xətaları erkən mərhələdə aşkar etməyə və zərurət yarandıqda funksiyanı tez bir zamanda deaktiv edərək sistemi qorumağa şərait yaradır.

Mayya Hüseynova