"OpenAI"ın illik gəlirinin 25 milyard dolları keçdiyi iddia olunur

"OpenAI"ın illik hesablanan gəlirinin 25 milyard ABŞ dollarını keçdiyi iddia edilir.

Valyuta.az xəbər verir ki, bu barədə The Information nəşri məlumat yayıb. Bildirilir ki, şirkətin 2026-cı ilin fevral ayına olan gəlir tempi bu səviyyəni göstərir.

Məlumata görə, "OpenAI"ın 2025-ci ilin sonunda təxminən 21,4 milyard dollar səviyyəsində olan gəlir tempi son aylarda artaraq 25 milyard dollardan çox olub. Qeyd olunur ki, bu rəqəm rəsmi illik maliyyə hesabatı deyil, şirkətin aylıq gəlir göstəricilərinin illik hesablanması əsasında formalaşan təxmini göstəricidir.

Şirkətin gəlir artımında əsas payı ChatGPT abunəlikləri və korporativ süni intellekt həlləri təşkil edir. Xüsusilə iri şirkətlərlə bağlanan API və lisenziya müqavilələrinin "OpenAI"ın gəlirlərində mühüm yer tutduğu bildirilir.

Müqayisə üçün qeyd edilir ki, digər böyük AI şirkətlərindən biri olan "Anthropic"in gəlirinin təxminən 9 milyard dollar səviyyəsində olduğu bildirilir.

"OpenAI" isə bu rəqəmlərlə bağlı hələlik rəsmi açıqlama verməyib.

Sərvanə Rəmixanova