AK "Samsung" və "Google" arasında tərəfdaşlığı yoxlayacaq

2024-cü ilin yanvarında "Samsung" şirkəti "Google" texnologiyaları əsasında quraşdırılmış "Galaxy AI" ilə təchiz olunmuş "Galaxy S24" smartfonlarının yeni seriyasını təqdim etdi. İndi Avropa Komissiyası iki şirkətin tərəfdaşlığının üçüncü tərəfin süni intellekt sistemlərinə mane olub-olmadığını yoxlamaq qərarına gəlib.

Valyuta.az xəbər verir ki, bu barədə "Reuters" yazıb.

Qeyd olunur ki, Aİ-nin antiinhisar tənzimləyicisi "Samsung" və "Google" arasında uzunmüddətli razılaşmada maraqlıdır. Avropa Komissiyası "Google" "Gemini AI"nin tətbiqinin smartfonlarda digər modellərin və ya çatbotların quraşdırılmasına mane olub-olmadığını və onların funksionallığını məhdudlaşdırıb-məhdudlaşdırdığını öyrənmək üçün sənaye iştirakçılarına sorğu göndərib.

Bundan əlavə, tənzimləyici digər chatbot tərtibatçılarının smartfon istehsalçıları ilə analoji müqavilələr bağlamağa cəhd edib-etməmələri və əgər belədirsə, hansı səbəblərə görə rədd edildiyi ilə maraqlanır.

Avropa Komissiyası "Google" və "Samsung"un hərəkətlərində rəqabətə zidd hərəkətlərin əlamətlərini aşkar edərsə, şirkətlər antiinhisar ittihamları ilə üzləşə bilər.

Paşa Məmmədli