Süni intellekt startapı 550 milyon dollar investisiya alıb

Süni intellekt əsaslı hüquq texnologiyası startapı “Legora” D seriyası investisiya turunda 550 milyon dollar yatırım cəlb edib.

Valyuta.az xəbər verir ki, bununla da şirkətin ümumi dəyərləməsi 5,55 milyard dollara çatıb.

Qeyd edək ki, “Legora”nın C seriyası investisiya turunda 150 milyon dollar yatırım aldığı daha əvvəl açıqlanıb..

Böyük dil modelləri (LLM) və əsasən “Claude” üzərində qurulan “Legora” mürəkkəb hüquqi işlərdə vəkillərə dəstək verən platforma kimi təqdim olunur. Şirkətin baş icraçı direktoru Maks Yunestrand (Max Junestrand) platformanın “Claude”dan fərqini belə izah edib: “Hər kəsin ‘Claude’ vasitəsilə öz cib vəkilinə sahib olması çox yaxşıdır, lakin biz eyni istifadə ssenarisini həll etmirik”.

Onun sözlərinə görə, “Legora” müştərilərin mövcud iş axınlarına inteqrasiya olunmağa fokuslanır. Platformadan hazırda 800 hüquq firması və hüquq komandası istifadə edir.

Şirkət həmçinin Hyuston və Çikaqo şəhərlərində də ofislər açacağını açıqlayıb. Bundan əlavə, “Legora” 2026-cı ilin sonuna qədər ABŞ-dakı ofislərində 300-dən çox əməkdaşın çalışmasını və yeni yerli mərkəzlərin yaradılmasını planlaşdırır.

Mayya Hüseynova