Sərvətini itirən 10 milyonçu və milyarder: “Zənginlik həmişə davam etmir”

Dünyanın ən varlı insanları belə bəzən yanlış qərarlar, uğursuz investisiyalar və hətta sadə diqqətsizlik səbəbilə sərvətlərinin böyük hissəsini itirə bilirlər. Məşhur ifadədə deyildiyi kimi, “nə zaman dayanacağını bilməlisən”. Lakin bu siyahıdakı şəxslər həmin məsləhəti nəzərə almayanlardır.

Tarix boyunca sürətlə varlanıb eyni sürətlə kasıblaşan saysız-hesabsız insanlar olub. Varlıq insanlara özünəinam və risk alma gücü versə də, bu risklər çox zaman böyük itkilərlə nəticələnib. Sadəcə sərvət qazanmaq kifayət etmir, onu idarə etmək də ayrıca bacarıq tələb edir.

Valyuta.az sərvətini qazanıb sonra itirən ən tanınmış 10 milyonçu və milyarderin hekayəsi təqdim edir.

1. M.C. Hammer - “Çox pul, çox xərclər”

1990-cı illərin super ulduzu M.C. Hammer “U Can’t Touch This” hitinin zirvə dövründə təxminən 30 milyon dollar qazanmışdı. Lakin lüks həyat tərzi, böyük müşayiət heyəti, bahalı əmlaklar və uğursuz investisiyalar onu tez bir zamanda borca saldı.
1990-cı illərin sonunda müğənni iflasını elan etdi.

2. Jordan Belfort -“Uoll Stritin Canavarı”

Leonardo DiCaprionun canlandırdığı Jordan Belfort bir vaxtlar ildə 250 milyon dollar gəlir əldə edən broker idi. Şişirdilmiş səhmlər (“pump and dump”) mexanizmi ilə böyük sərvət qazanan Belfort, daha sonra Ədliyyə Nazirliyi tərəfindən dələduzluğa görə həbs edildi.
22 ay həbs yatdı və yüz milyonlarla dollar borcu ödəmək öhdəliyi qoyuldu. Bu gün Belfort motivasiya spikeri kimi fəaliyyət göstərir.

3. Allen Stanford - 110 il həbs cəzasına səbəb olan “Ponzi” sxemi

Stanford Financial Group-un rəhbəri Allen Stanford ABŞ tarixinin ən böyük maliyyə fırıldaqçılarından biri sayılır. O, investorların milyardlarla dollarını mənimsəyərək lüks həyat tərzini maliyyələşdirib.
SEC onun fəaliyyətini “davam edən nəhəng fırıldaq” adlandırdı. Stanford hazırda 110 illik həbs cəzasını çəkir.

4. Sean Quinn - İrlandiyanın ən varlı adamı 3 il sonra iflas etdi

2008-ci ildə 6 milyard dollarlıq sərvəti ilə İrlandiyanın ən varlı şəxsi idi. Lakin Anglo Irish Bank-a 2,8 milyard dollarlıq riskli investisiya və bu pulu öz sığorta şirkətindən borc alması onun maliyyə imperiyasını çökməyə apardı. 2011-ci ildə iflasını elan etdi.

5. George Foreman - borcdan rinqə qayıdan çempion

Əfsanəvi boksçu 1980-ci illərdə iflasın astanasına gəlmişdi. Bu vəziyyət onu 45 yaşında yenidən rinqə qaytardı. Foreman 1994-cü ildə çempion titulunu geri aldı və qazandığı pullarla borclarını bağladı.
Daha sonra “George Foreman Grill” markası ilə milyonlarla cihaz sataraq yenidən varlandı. Hazırda sərvəti 200 milyon dollara yaxındır.

6. Willie Nelson - 16,7 milyon dollar vergi borcu

1990-cı ildə vergi borcları səbəbilə IRS onun bank hesablarını və daşınmaz əmlakını müsadirə etdi. Məşhur müğənni borcunu ödəmək üçün “The IRS Tapes: Who’ll Buy My Memories?” adlı musiqi albomu buraxdı.
Bütün gəlir vergi qurumuna yönləndirildi və borc 1993-cü ildə bağlandı.

7. Björgólfur Gudmundsson - İslandiyanın bank çöküşü ilə “yoxsullaşan” milyarder

"Landsbanki" bankının əsas səhmdarlarından olan Gudmundsson 1,1 milyard dollarlıq sərvətə sahib idi. 2008-ci il maliyyə böhranında bank çökdükdə onun varidatı da tamamilə itib.
O, həmçinin mənimsəmə və fırıldaqçılıqda şübhəli bilinir.

8. Johnny Unitas - yanlış biznes investisiyaları ilə məhv olan sərvət

NFL-in əfsanəsi Unitas milyonlarla dollar qazanmışdı, lakin müxtəlif biznes sahələrinə etdiyi investisiyalar uğursuz oldu. 1990-cı illərdə iflasını elan etdi.
Ölümündən sonra belə onun əmlakı borc səbəbindən məhkəmə çəkişmələrinə cəlb edilmişdi.

9. Scott Eyre - Ponzi qurbanı olan beysbol ulduzu

MLB çempionu Scott Eyre sərvətini Allen Stanfordun fırıldaq sxeminə yatıraraq demək olar ki, bütün pulunu itirdi.
2009-cu ildə “mən müflis olmuşam” etirafından sonra Phillies komandası ona əməkhaqqı avansı verməli oldu.

10. Kim Dotcom - FBI basqını ilə imperiyası çökmüş internet kralı

"Megaupload"ın qurucusu Kim Dotcom bir vaxtlar yüz milyonlarla istifadəçisi olan nəhəng platformaya sahib idi. 2012-ci ildə FBI xidmətini bağladı və Dotcom-un sərvəti demək olar ki, məhv oldu. O, hazırda ABŞ-a ekstradisiya tələbinə qarşı mübarizə aparır və “Mega” adlı yeni şifrəli bulud xidməti üzərində çalışır.

Sərvanə Rəmixanova