Hazır ev almaq sərfəlidir, yoxsa torpaq alıb ev tikmək?

Son vaxtlar iqtisadi şərtlər və tikinti bazarında tez-tez yaranan dəyişikliklər səbəbi ilə insanlar ev almaq və yaxud tikməklə bağlı seçim qarşısında qalırlar. Təbii ki, insanlar özünə sərfəli olanı seçəcəklər. Bəziləri düşünür ki, hazır ev almaq daha sərfəlidir, bəziləri isə əksinə, ev tikməyin daha ucuz başa gəldiyi qənaətindədirlər.

Hansı daha ucuz başa gəlir? 

ATMİA üzvü, “Estimator” şirkətinin rəhbəri Bədir Qədirov Valyuta.az-a bildirdi ki, eyni keyfiyyətdə məhsuldan istifadə olunsa, tikinti xərclərində ciddi fərq yaranmır. Burada qiymət fərqi yaradan əsas məsələ hansı ərazidə olması və sənəd məsələsidir:

“Konkret demək olmaz ki, ev tiksən, daha ucuz başa gələr, yaxud əksinə almaq daha sərfəlidir. Çünki burada əsas olan torpaq faktorudur. Evin şəhərin hansı tərəfində tikilməsindən və yaxud alınmasından söhbət gedir. Ev tikiləcək və yaxud alınacaq ərazidən, torpaqdan çox nüans asılıdır. Elə ərazilər var ki, torpaq evin tikiləcəyi qiymətə yaxındır, elə torpaq ərazisi də var ki, ucuz və sərfəlidir”.

“Sənədli torpaq azdır”

B.Qədirov ev və ya torpaq alarkən, insanların gözardı etdiyi məsələlərə toxundu:

“Bəzən insanlar sənədsiz evin qiymətinə baxırlar. Görür ki, özü torpaq alıb ev tiksə, baha başa gələcək. Sənədsiz evlər adətən, daha ucuz təklif olunur. Yaxud da deyir ki, sənədli ev baha almaqdansa, sənədsiz torpaq alıb özüm tikərəm, bu ucuz olacaq. Amma ucuza qaçmaqdansa, torpaq və ya ev alarkən sənədin olub-olmamasını mütləq yoxlamaq lazımdır. Unutmayaq ki, sənədsiz torpaq və ya ev ucuz ola bilər, amma bunun problemləri sonradan ortaya çıxır”.

“Şəhərin mərkəzində yaşamaq baha-başa gəlir”

B.Qədirov şəhərin baha və ucuz ərazilərindən danışdı:

“Torpaq və ya ev alarkən şəhərin hansı ərazisində almaq istədiklərinə insanlar yaxşı baxmalıdır. Çünki şəhərin müxtəlif yerlərində qiymətlər arasında olduca fərq var. Məsələn, nümunə olaraq, Masazır ərazisini götürsək, torpaq alıb tikmək sərf edir. Amma şəhərin mərkəzində - Neftçilər, Qara Qarayev, Nərimanov və.s kimi ərazilərdə torpaq çox bahadır. Bu ərazilərdə bina evi almaq sərf edir. Qeyd etdiyim kimi bu məsələyə bir mənalı fikir bildirmək çətindir. Çünki torpağın və ya hazır evin alınmasında toxunduğum məsələlər ortaya çıxır”. 

Sərvanə Rəmixanova