Ailə biznesi qurmağın mənfi tərəfləri varmı?

Bəzən biznes quranda güvənəcəyimiz ortaq axtarırıq və tanıdığımız insanların olmasına üstünlük veririk. Məhz buna görə də bəzi insanlar ailə biznesi yaradır. Evin içindən iş ortağı seçirlər. Bəs ailə biznesinin mənfi tərəfləri varmı?

“SAT Group” şirkətinin həmtəsisçisi, idarəçi və biznes konsultant Anar Bayramov Valyuta.az bildirdi ki, ailə biznesi dünyada çox yayılmış praktikadır: “Ailə biznesi düzgün idarə edildiyi, yəni peşəkar yanaşıldığı təqdirdə çox effektiv ola bilir. Sadəcə gərək peşəkar yanaşılsın, emosionallıq olmasın. Məsələlərə sırf ailə üzvü, qohumluq kontekstində baxılmasın. Məsələn, cəlb edilmiş əməkdaşlara "ögey" yanaşılmasın. Ailə biznesində normal peşəkar iş mühitinin yaradılması vacibdir".

Onun sözlərinə görə, ailə biznesində rollar, iş bölgüsü, səlahiyyətlər, hesabatlıq çox aydın şəkildə müəyyən edilməlidir. 

Bəs ailə biznesi ən çox nələrə məruz qaldıqda batmağa məcbur olur?

A.Bayramov deyir ki, rollar, məsuliyyətlər aydın müəyyənləşdirilməyəndə ailə biznesi batmağa başlayır: “Məsələn, iş yerində kimin müdir olduğu bilinmir və ya hamı müdirdir. Nəticədə hərə bir tərəfə çəkir, heç kimin konkret məsuliyyəti olmur. Daha bir səbəb isə peşəkarlara etibar etməməkdir. "Kənardan kimsə bizim kimi bu işi bilməz" düzüncəsi ilə heç kim yaxına buraxılmır, nəticədə qeyri-peşəkar yanaşma şirkəti batırır. Ailə bizneslərində rast gəlinən ən böyük problemlərdən biri də sərvət-miras bölgüsüdür ki, ciddi sıxıntılar yarada bilir. Bütün bunlar ailə bizneslərində rast gəlinən mənfi nüanslardır."

Sərvanə Rəmixanova