10 qapı sıxıldıqda, 11-ci qapını gülərək aç - Satış inadkarlığı ilə yazılmış uğur hekayəsi

John Paul DeJoria bu gün milyard dollarlıq iki məşhur brendin – “Paul Mitchell” və “Patrón Tequila”nın qurucularından biri kimi tanınır. Lakin onun uğur hekayəsi yalnız bizneslə deyil, yoxsulluq, rədd cavabları və inadkarlıqla dolu həyat yoluyla diqqət çəkir.

Valyuta.az xəbər verir ki, DeJoria göstərdi ki, bir insanın haradan başladığı deyil, hansı əzmlə davam etdiyi vacibdir.

Los Ancelesdə doğulan DeJoria uşaq yaşlarından ailəsinə maddi dəstək olmaq üçün qapı-qapı Milad kartları satırdı. Bu, onun ilk satış təcrübəsi idi və sonradan deyəcəyi məşhur ifadənin təməlini qoydu: “10 qapı sıxıldığında 11-ni gülərək aç”. Bu yanaşma onun bütün həyat və biznes fəlsəfəsini müəyyənləşdirdi. Gənclik illərində avtomobil sürücülüyü, zəng kartı satışı, təmizlik işləri kimi müxtəlif peşələrdə çalışdı, hətta evsiz yaşadığı dövrlər də oldu. Amma hər çətinlik ona daha güclü irəliləmək üçün bir səbəb verdi.

1980-ci illərin əvvəllərində, cəmi 700 dollar borcla, saç ustası Paul Mitchell ilə birlikdə “Paul Mitchell” markasını qurdu. Məhsulları öz maşınında salonlara aparır, bir-bir təqdim edirdi. Qapılar üzünə bağlanır, salon sahibləri onu rədd edirdi. Amma o, hər “yox” cavabını bir “bəli”yə aparan addım kimi görürdü. Bu inadkarlıq nəticə verdi. “Paul Mitchell” brendi qısa zamanda salon bazarında tanındı və illik gəliri bir milyard dollara yaxınlaşdı. 2015-ci ilə olan məlumata görə, şirkətin illik gəliri təxminən 900 milyon dollar təşkil edirdi.

Saç baxımı sahəsində uğur qazandıqdan sonra DeJoria bir qədər fərqli, amma eyni dərəcədə çətin bir bazara – alkoqollu içkilər sektoruna daxil oldu. 1989-cu ildə “Patrón Tequila” markasını yaratdı. Məqsədi tequilanı yalnız ucuz içki kimi deyil, yüksək keyfiyyətli və zərif bir seçim kimi təqdim etmək idi. O, bu məqsədinə çatdı. 2018-ci ildə bu brendi tanınmış “Bacardi” şirkətinə 5.1 milyard dollara satdı.

Hazırda DeJoria-nın sərvəti təxminən 2.9 milyard dollardır. Bəzi mənbələr bu rəqəmi 3 milyard dollara qədər göstərir. Forbes, Alux və CelebrityNetWorth kimi etibarlı mənbələr bu sərvətin əsas hissəsinin həm “Paul Mitchell” brendindən, həm də “Patrón” satışından gəldiyini təsdiqləyir.

DeJoria-nın hekayəsi bir daha sübut edir ki, istənilən çətinlik, istənilən “yox” cavabı əslində bir fürsətə çevrilə bilər. Əgər inam, əzm və doğru baxış varsa, 10 qapı sıxıldığında 11-ni gülərək açmaq mümkündür.

Mayya Hüseynova