Pakistanda yerli bir mühəndis "Tesla Cybertruck" avtomobilinin surətini hazırlayıb. 

Valyuta.az xəbər verir ki, bu barədə carscoops.com məlumat yayıb.

Məlumata görə, bu avtomobil naməlum bir pikap modelinin əsasında yığılıb. Avtomobilin hazırlanması üçün 3 milyon Pakistan rupisi (təxminən 18 min manat) xərclənib. Müqayisə üçün qeyd edək ki, ABŞ-da orijinal "Tesla Cybertruck"ın qiyməti 70 min dollardan (təxminən 119 min manat) başlayır.

Pakistanda hazırlanan surət orijinal modeldən ölçü baxımından xeyli kiçikdir: avtomobil daha qısa, daha alçaq və daha dar ölçülərə malikdir. Avtomobilin hansı mühərriklə təchiz olunduğu barədə məlumat verilməyib.

Tesla launched in Pakistan ? pic.twitter.com/wUPGi4QlQj

— Frontalforce ?? (@FrontalForce) January 21, 2025

Digər oxşar hallar

Bənzər bir hadisə 2017-ci ildə Braziliyada baş verib. Yerli sakin Xose Sikeyra "Ferrari F40" superkarının surətini hazırlamaq üçün yerli zibilliklərdən tapdığı ehtiyat hissələrindən istifadə edib. Xose özünün "Ferrari" markalı avtomobili olmasını arzulayıb. Lakin avtomobili düzəltdikdən bir il sonra o, maddi çətinliklər səbəbindən maşını satmaq məcburiyyətində qalıb.

Xose Sikeyranın diş həkimliyi kabineti qarət olunduğu üçün işi dayanıb və bu, onun maliyyə vəziyyətinə ciddi təsir edib. Sikeyranın hazırladığı "Ferrari F40"ın satışı ilə bağlı xəbər "Ferrari" şirkətinin diqqətini cəlb edib və şirkət ona qarşı məhkəmə iddiası qaldırıb. Xose də qarşılıqlı iddia ilə məhkəməyə müraciət etsə də, məhkəmə onun tələblərini rədd edib. Hazırda Xose Sikeyranın hesabları dondurulmuş vəziyyətdədir.

Paşa Məmmədli