"Yelo Bank"ın mənfəəti 27% azalıb – Gəlirlər geriləyib, xərclər yüksəlib

Yelo Bank 2025-ci ili 31 milyon 276 min manat xalis mənfəətlə başa vurub. 

Valyuta.az bankın illik maliyyə hesabatına istinadən xəbər verir ki, bu, 2024-cü illə müqayisədə 12 milyon 22 min manat və ya 27,8% azalma deməkdir.

Faiz xərcləri 2025-ci ildə 67 milyon 550 min manat təşkil edib. Bu, ötən ilin 53 milyon 793 min manatlıq göstəricisi ilə müqayisədə 13 milyon 757 min manat və ya 25,6% artım deməkdir. Faiz yükündəki artım əsasən depozitlər üzrə faiz ödənişlərindən qaynaqlanır. Belə ki, depozitlər üzrə faizlər illik müqayisədə 14 milyon 331 min manat və ya 29,5% artaraq 62 milyon 831 min manata yüksəlib.

Eyni zamanda, Mərkəzi Bank və dövlət fondları qarşısında öhdəliklər üzrə faiz xərcləri 2024-cü ildə 1,73 min manat olduğu halda, 2025-ci ildə bu göstərici 3 milyon 488 min manata yüksəlib.

Qeyri-faiz gəlirləri tərəfdə isə azalma müşahidə olunub. 2025-ci ildə bu gəlirlər 20 milyon 320 min manat olub ki, bu da 2024-cü illə müqayisədə 11 milyon 446 min manat və ya 36,0% azdır. Qeyri-faiz gəlirlərinin əsas mənbəyi olan alınan haqq və komissiya gəliri də 32,6% azalaraq 11 milyon 639 min manata enib. Bu göstərici ötən il 17 milyon 272 min manat təşkil etmişdi.

Bankın xarici valyutadan gəliri də zəifləyib. 2025-ci ildə bu mənbədən 7 milyon 509 min manat gəlir əldə olunub ki, bu da 2024-cü illə müqayisədə 5 milyon 212 min manat və ya 41,0% azalma deməkdir.

Qeyri-faiz xərcləri isə əks istiqamətdə artmaqda davam edib. 2025-ci ildə bank bu kateqoriyada 91 milyon 317 min manat xərc çəkib – bu da illik müqayisədə 4 milyon 649 min manat və ya 5,4% artım deməkdir.

Xalis əməliyyat mənfəəti isə 38 milyon 137 min manata düşüb. Bu göstərici 2024-cü ildə 39 milyon 377 min manat idi və nəticə etibarilə 1 milyon 240 min manat və ya 3,1% azalma qeydə alınıb.

Depozitlər ümumilikdə artım göstərərək 1 milyard 94 milyon 325 min manata çatsa da, hüquqi şəxslərin depozitləri azalıb. Belə ki, bu kateqoriya üzrə depozitlər 2024-cü ildəki 197 milyon 822 min manatdan, 2025-ci ildə 163 milyon 782 min manata düşüb ki, bu da 34 milyon 40 min manat və ya 17,2% azalma deməkdir.

Mayya Hüseynova