“Uğur - 99 dəfə yıxılıb, 100-cü dəfə ayağa qalxmaq bacarığıdır” - SƏHƏR OXUSU

Yaponiyalı məşhur sahibkar, “Honda” şirkətinin qurucusu Soiçiro Honda belə deyirdi: “Uğur - 99 dəfə yıxılıb, 100-cü dəfə ayağa qalxmaq bacarığıdır”. Bu sadə səslənsə də, arxasında böyük bir həyat və biznes fəlsəfəsi dayanır. Çünki sahibkarlıq yolunda heç nə ilk cəhddə alınmır. Heç kim uğura düz xətlə getmir. Hər addımda yeni çətinliklər, yeni səhvlər və yeni qərarsızlıqlar ortaya çıxır. Amma bu yolun içində qalmaq üçün insanın özünü bu reallığa hazırlaması vacibdir.

Valyuta.az xəbər verir ki, uğursuzluq çox zaman insanlarda peşmanlıq və inamsızlıq hissi doğurur.

Bəzən bir ideya uğursuz alınanda insanlar onu birdəfəlik atırlar. Amma uğursuzluq bir növ təlim kimidir. Necə ki, idmançı uğur qazanmaq üçün saysız-hesabsız məşqlər edir, biznesdə də uğur üçün bir neçə dəfə yıxılmaq labüddür. Əsas məsələ bu yıxılmalardan sonra ayağa qalxıb yenidən cəhd etməkdir.

Sahibkarlar üçün uğursuzluğu öncədən planın bir hissəsi kimi qəbul etmək faydalıdır. Bu zaman insan hər problemi böhran kimi yox, öyrənmək fürsəti kimi görür. Məsələn, bir məhsul bazarda uğur qazanmadıqda, sual vermək lazımdır: Nəyi fərqli edə bilərdim? Müştəri nə istəyirdi ki, mən təklif edə bilmədim? Bu cür suallar uğursuzluğun içində gizlənmiş dərsi tapmağa kömək edir.

“Honda” şirkətinin ilk illərində motorlu velosipedlər istehsal edilirdi. Amma məhsul bazarda maraq doğurmadı. Bu vəziyyət bir çox insan üçün layihəni dayandırmaq səbəbi olardı. Lakin Soiçiro Honda geri çəkilmədi. O, bazarı daha dərindən öyrənməyə başladı, insanların nə axtardığını anlamağa çalışdı və nəticədə şirkətin istiqamətini dəyişdi. Bugünkü “Honda” - məhz o uğursuzluqlardan çıxan nəticələrin məhsuludur.

Əgər səhər günə belə bir sualla başlasan: “Bu gün nəyisə səhv etsəm, bundan nə öyrənəcəyəm?” - o zaman sənin üçün səhv artıq qorxulu olmur. Əksinə, yeni bir bacarıq, yeni bir təcrübə və bəlkə də yeni bir yol açan fürsətə çevrilir. Uğur bəzən birbaşa gəlmir - o, səhvlərin arasında gizlənir.

Mayya Hüseynova